Malaızııada 11 jyl buryn 239 jolaýshysymen qosa joǵalǵan ushaqty izdeý jumystary jandandy
ASTANA. KAZINFORM — Malaızııa bıligi Malaysia Airlines áýe kompanııasynyń MH370 reısiniń qaldyqtaryn izdeý jumystary 30 jeltoqsannan bastap qaıta jalǵasatynyn málimdedi. Bortynda 239 adam bolǵan áýe kemesi joǵalyp ketkeninen on jyldam astam ýaqyt ótti, dep habarlaıdy VVS.
Іzdeý jumystary naýryz aıynda bastaldy, biraq aýa raıynyń qolaısyzdyǵyna baılanysty kóp uzamaı toqtatyldy.
— Sońǵy jaǵdaılar (Malaızııanyń) osy qaıǵyly jaǵdaıdan zardap shekken otbasylarǵa jubatýdy qamtamasyz etýge degen umtylysyn aıqyndaıdy, — dep málimdedi sársenbide eldiń Kólik mınıstrligi.
Aǵymdaǵy izdeý jumystaryn Ocean Infinity geologııalyq barlaý kompanııasy júrgizedi.
Aldyńǵy izdeý áreketteri 2017 jyly aıaqtalǵan, oǵan 26 elden 60 keme men 50 ushaq qatysqan. 2018 jyly izdeý jumystaryn Ocean Infinity kompanııasy júrgizdi, alaıda ol úsh aıdan soń aıaqtaldy.
Eske sala ketsek, MH370 reısi 2014 jyly Kýala-Lýmpýrdan Beıjińge ushyp bara jatqanda joǵalyp ketti, bul avıatsııa tarıhyndaǵy eń iri izdeýdiń sebebi boldy.
Ekıpajben baılanys 2014 jyldyń 8 naýryzynda ol ushyp shyqqannan keıin bir saǵattan az ýaqyt ishinde úzildi, al radar ushaqtyń bastapqy ushý baǵytynan aýytqyǵanyn kórsetti.
Bul oqıǵa áli kúnge deıin jolaýshylardyń týystaryn alańdatatyn avıatsııadaǵy eń úlken qupııalardyń biri bolyp otyr. Kóp jyldar boıy adamdar ushaqty tabý óte qıyn bolǵanyna qaramastan, izdeý jumystaryn qaıta jalǵastyrýdy talap etip keledi.
Atalǵan jaǵdaı kóptegen boljam men túrli teorııanyń shyǵýyna sebep boldy. Mysaly, keıbireýler ushaqty ushqysh ádeıi qulatqan bolýy múmkin dese, endi bireýler ony bireýler basyp alǵan dep sanaıdy.
2018 jyly júrgizilgen tergeý ushaq basqarýy ádeıi ózgertilip, baǵyty basqa jaqqa burylǵan bolýy múmkin ekenin kórsetti. Biraq naqty bir qorytyndy jasalmady.
Tergeýshiler ol kezde: «Naqty jaýap tek ushaqtyń synyqtary tabylǵanda ǵana aıtylady», – degen bolatyn.
Buǵan deıin Qazaqstannyń Azamattyq avıatsııa komıteti Airbus áýe kemelerindegi baǵdarlamalyq qamtamasyz etýdi jańartý jumystary 29 qarasha kúni tolyq aıaqtalatynyn jazǵanbyz.