Malaızııa joǵalyp ketken ushaǵyn izdeýdi búgin qaıta bastaıdy
ASTANA. QazAqparat - Malaızııa Malaysia Airlines áýe kompanııasynyń naýryz aıynda joǵalyp ketken ushaǵyn izdestirý jumystaryn búginnen bastap qaıta jandandyrmaq, dep habarlaıdy The Guardian.
Іzdeý jumystaryna sýdaǵy janar-jaǵarmaı qaldyqtaryn tabýǵa septesetin sensorlarmen jáne beınekamerlarmen jabdyqtalǵan úsh keme tartylady. Olardyń eń alǵashqysy apat oryn alǵan dep boljanyp otyrǵan jerge 5 qazanda kelip jetýi tıis.
Esterińizge sala keteıik, Kýala-Lýmpýrden Beıjińge MN370 reısimen shyqqan Boeing 777-200 áýe laıneri 227 jolaýshysy jáne bortyndaǵy 12 ekıpaj múshesimen 8 naýryzǵa qaraǵan túni radar ekranynan joǵaldy. Ushaq ıesi Malaysia Airlines kompanııasy onyń Úndi muhıtyna qulaǵanyn aıtady. Resmı ókilder ondaǵy jolaýshylardyń bári de qaza tapty dep otyr. Joǵalǵan ushaqty izdestirý jumystaryna birneshe el atsalysýda, olardyń qatarynda AQSh, Malaızııa, Avstralııa men Qytaı elderi bar. Áli kúnge deıin atalmysh ushaq týraly eshbir derek joq.
