Malaızııa jaǵalaýynda 37 zańsyz mıgranty bar qaıyq sýǵa batyp ketti
ASTANA. KAZINFORM – Bortynda 37 zańsyz mıgrant bolǵan qaıyq Malaızııanyń batysyndaǵy Pangkor araly mańynda sýǵa batty. Qazirgi ýaqytta 14 adam iz-túzsiz joǵalǵandar qatarynda, dep habarlady seısenbi kúni Malaızııanyń Teńiz quqyq qorǵaý agenttigi (MMEA). Bul týraly Sınhýa agenttigi jazdy.
Perak shtatyndaǵy MMEA dırektory Mohamad Shýkrı Hotobtyń málimdemesine sáıkes, oqıǵa týraly aral mańynan 23 aman qalǵan adamdy taýyp, qutqarǵan malaızııalyq balyqshy habarlaǵan. Qazir bılik qalǵan 14 adamdy izdestirip jatyr.
– Aldyn ala tergeý nátıjesi mıgranttardyń 9 mamyr kúni Indonezııadaǵy Kısaran qalasynan shyqqanyn kórsetti. Olar Malaızııanyń birneshe óńirine, sonyń ishinde Penang, Terengganý, Selangor jáne Kýala-Lýmpýrǵa baǵyt alǵan, – dedi sheneýnik.
Onyń aıtýynsha, joǵalǵandardy izdeý jumystaryna Malaızııanyń Teńiz quqyq qorǵaý agenttigi katerlerdi, tikushaqty jáne barlaý ushaǵyn jumyldyrǵan.
Eske sala ketsek, 15 sáýir kúni Úndi muhıtyndaǵy qaıyq apatynan keıin Malaızııaǵa bara jatqan 250 mıgrant iz-túzsiz joǵalyp ketken edi.
