Malaızııa musylmandarǵa arnalǵan uıaly telefon shyǵardy
ASTANA. 12 jeltoqsan. QazAqparat /Gúlmıra Alıakparova/ - Musylmandar úshin qubylanyń ornalasqan baǵytyn kórsetetin, namaz ýaqyty kirgende avtomatty túrde dybyssyz rejimge kóshetin jáne
ózge de «aqyldy» fýnktsııalary bar mobıldi telefon shyǵaryldy. Bul týraly Qazaqstan Musylmandary dinı basqarmasynyń resmı saıtynda habarlandy.
Enmac MQ710 saýda belgisin ıemdengen qalta telefonyn Malaızııanyń jergilikti «Enmac» kompanııasy jasap shyǵardy. Telefonǵa arab tilin qosa alǵanda barlyǵy 30 ulttyń tilinde Quran mátini ornalastyryldy. Baılanys quralynan sondaı-aq Paıǵambardyń (s.ǵ.s.) hadısterin de tabýǵa bolady.
Onymen birge, uıaly telefon musylmandar úshin asa qajetti birneshe baǵdarlamamen qamtamasyz etilgen. Máselen, «Qibla Compass» baǵdarlamasy arqyly qubylanyń ornalasqan baǵytyn bilýge bolsa, «Zakat Calculator» arqyly zekettiń qunyn tez arada eseptep shyǵara alasyz. Sondaı-aq namaz bastalǵan ýaqytta telefon daýyssyz rejimge avtomatty túrde kóshedi.
Telefonnyń baǵasy ázirshe 160 AQSh dollary kóleminde belgilenip otyr. Bolashaqta «Enmac» kompanııasy musylmandarǵa arnap pleer, noýtbýk taǵy da basqa qurylǵylardy shyǵarýdy oılastyrýda.
