Malaızııa musylmandardyń demalýyna eń qolaıly elder reıtıngisinde kósh bastady
ASTANA. 18 qańtar. QazAqparat - Malaızııa - álemdegi musylmandardyń demalýyna eń qolaıly el. Malaı memleketi basqa týrıstik 50 elden oq boıy ozyq tur.
Bul týraly Sıngapýrdyń saıahat jónindegi halyqaralyq reıtingilik kompanııasy júrgizgen saýalnama nátıjesinde belgili boldy, dep habarlaıdy muslim.kz. Saýalnamaǵa qatysýshylar ózderi barǵan eldegi qaýipsizdik, halal taǵamdarmen qamtamasyz etý jáne qulshylyq jasaýǵa qolaıly jaǵdaı jasaý deńgeıin paıyz boıynsha kórsetken.
Halyqaralyq kompanııanyń atqarýshy dırektory Fazal Bahardın: «Sheteldik týrıster arasynda júrgizilgen saýalnama qorytyndysy boıynsha, Malaızııaǵa barǵan namazhan adam osy eldiń qaı jerinde bolsa da qulshylyǵyn qaza jibermeı óteı alady eken. Meıli saýda ortalyǵynda bolsyn, meıli áýejaıda bolsyn, musylman jolaýshynyń ǵıbadat jasaýyna esh kedergi joq», - dedi.
Ekinshi orynǵa Mysyr taban tiregen. Al úshinshi orynǵa Birikken Arab Ámirlikteri men Túrkııa qatar jaıǵasqan. Saýd Arabııasy bolsa, tórtinshi orynda tur. Al Sıngapýr alǵashqy bestikke ilikken.
Fazal Bahardınniń aıtýynsha, álemdegi musylmandar eń kóp turatyn Indonezııa osy elge qydyryp keletin múminderge jaqsy jaǵdaı jasaı almaı otyrǵanyn aıtady. Fazal Bahardın: «Indonezııa úshin basty másele - bul elge kelgen musylman saıahatshysy halal tamaq taba almaı qınalady. Degenmen, jergilikti turǵyndar úshin bul bálendeı kúrdeli másele emes sııaqty», - deıdi. Al musylmandar Saýd Arabııasyna kóp jaǵdaıda qajylyq óteý úshin barady eken.
Memleketterden basqa qalalar arasynda da saraptama júrgizilgen. Bul turǵyda Dýbaı Kýala-Lýmpýrdyń aldyn orap ketken. Odan keıingi oryndarda, Ystambul, Jıdda, Sıngapýr, Kaır, Abý Dabı, Nıý-Delı, London jáne Doha qalalary ornalasqan.
