Malaızııa bıligi Túrkııaǵa Gúlenniń 3 jaqtasyn ustap berdi
ASTANA. QazAqparat - Malaızııa bıligi Túrkııaǵa «Fethýllahshylar terrorıstik uıymyna» qatysy bar degen kúdikpen 3 adamdy ustap berdi. Bul týraly Túrkııa Syrtqy ister mınıstri Mevlıýt Chavýshoglynyń málimdesine silteme jasap, Anatolııa agenttigi habarlady dep jazdy Reseıdiń TASS agenttigi.
Agenttik málimetterine qaraǵanda, kúdiktilerdi Túrkııa tarapyna berý týraly kelisim ótken aptada Chavýshoglynyń Malaızııa premer-mınıstri Nadjıb Razakpen bolǵan kezdesýinde jasaldy.
«Olar ekijaqty kelisimderden soń úsh adamdy ustap berdi»,-dep keltirdi Túrkııa syrtqy ister mınıstriniń sózin agenttik.
Chavýshogly FETO-men kúresti jalǵastyra beretinin aıtady.
«Bizdiń olarmen kúresimiz el ishinde elden jyraqta da jalǵasa beredi. Biz olardyń basqan izderin ańdımyz»,-dedi ol.
Ankara 1999 jyldan beri AQSh-ta turyp jatqan Gúlen men onyń jaqtastaryn 15- shilde kúni Túrkııada bolǵan memlekettik tóńkeris jasaýǵa umtylý áreketterine qatysy bar dep aıyptaıdy. Ol kezde búlikti bir top jaýyngerler men sardarlar uıymdastyryp, 246 adam mert bolyp, 2 mynan astam adam jaraqat alǵan bolatyn.
