Malaızııa 16 jasqa tolmaǵan jasóspirimderdiń áleýmettik jelilerge kirýine shekteý engizbek
ASTANA. KAZINFORM — Kelesi jyldan bastap Malaızııa balalardy qorǵaý úshin tsıfrlyq ortaǵa baqylaýdy kúsheıtken elderdiń úlgisine súıene otyryp, 16 jasqa tolmaǵan paıdalanýshylardyń áleýmettik jelilerde tirkelýine tyıym salýdy josparlap otyr, dep habarlaıdy Kazinform.
Malaızııalyq The Star gazetiniń habarlaýynsha, eldiń Kommýnkatsııalar mınıstri Datýk Fahmı Fadzıl 16 jasqa tolmaǵan malaızııalyqtarǵa 2026 jyldan bastap áleýmettik jelilerde tirkelýge tyıym salynatynyn málimdedi. Ol Madanı úkimeti balalardyń onlaın qaýipsizdigin qamtamasyz etý sharalaryn kúsheıtýdi kózdep otyrǵanyn rastady.
Onyń aıtýynsha, platforma jetkizýshilerinen olardyń kelesi jyly eKYC elektrondyq paıdalanýshylardy sáıkestendirý júıesin engizetini kútilip otyr.
Mınıstr kıberalaıaqtyq týraly habardarlyqty arttyrý semınary aıaqtalǵan soń sóz sóıledi.
Fahmı atap ótkendeı, Aýstralııa kelesi aıda áleýmettik jeli paıdalanýshylary úshin jas shekteýlerin engizedi jáne Malaızııa bul tájirıbeni muqııat baqylaıtynyn bolady.
— Basqa elderdiń óz tásilderi bolýy múmkin, jáne biz olardy zertteımiz, — dedi ol.
Mınıstrdiń atap ótýinshe, maqsat — 16 jasqa tolmaǵan balalardyń áleýmettik jelilerge qol jetkize almaýyn qamtamasyz etý. Bul 1 qańtarda kúshine enetin Onlaın qaýipsizdik týraly zańǵa sáıkes keń aýqymdy sharalardyń bóligi bolmaq.
Fahmı sonymen qatar ata-analardy balalaryn ekran aldynda shamadan tys ýaqyt ótkizýdiń ornyna ashyq aýada is-sharalarǵa qatysýyn yntalandyrýǵa shaqyrdy. Ol ata-analar balalarynyń gadjetterdi paıdalanýyn baqylaýy kerek ekenin qosyp ótti.
Qazan aıynda mınıstrler kabıneti áleýmettik jeli paıdalanýshylarynyń eń tómengi jasyn 16-ǵa deıin kóterý týraly sheshim qabyldady.
Buǵan deıin elimizde balalardyń áleýmettik jelige tirkelýin jasyna qaraı shekteý usynylǵanyn jazǵan edik.
Aýstralııa Premer-mınıstri Entonı Albaneze eli álemde alǵash bolyp jasóspirimderge áleýmettik jelilerdi paıdalanýǵa tyıym salatynyn málimdedi.
Sondaı-aq Danııada 15 jasqa deıingi balalarǵa áleýmettik jelini qoldanýǵa tyıym salynǵanyn jazǵan bolatynbyz.
Túrkııa úkimeti 16 jasqa tolmaǵandarǵa áleýmettik jelini shekteý jáne 18 jasqa tolmaǵan balalarǵa jazany qaıta qarastyrý sharalaryn aıaqtady.