Malaızııa 1 qyrkúıekten bastap elden ushyp ketetinderge salyq salady
NUR-SULTAN. QazAqparat – Malaızııa bıligi 1 qyrkúıekten bastap elden ushyp ketetinderden alynatyn qosymsha salyq túrin engizdi. Qarjy mınıstri Lım Gýan Eng qol qoıǵan qaýlyda jańa salyqtyń somasy da belgilendi. Bul týraly The Straits Times basylymy jazdy, dep habarlaıdy QazAqparat.
Malaızııa Brýneı, Vetnam, Indonezııa, Kambodja, Laos, Mıanma, Sıngapýr, Taıland jáne Fılıppınmen birge Ońtústik-Shyǵys Azııa memleketteriniń qaýymdastyǵyna (ASEAN) múshe. Osy elderdiń birine ekonom-klaspen ushatyndardan eń az mólsherde alym alynady - 8 rınggıt ($1,9). Qyzmet kórsetý deńgeıi joǵary klastarmen ushatyndar 50 rınggıt ($11,9) tóleıdi.
Al ASEAN-ǵa múshe emes elderge saıahattaıtyndar ekonom-klass úshin 20 rınggıt ($4,7), bıznes-klass úshin - 150 rınggıt ($35) tóleıdi.
Malaızııa Qarjy mınıstrliginiń málimdeýinshe, 2 jasqa tolmaǵan balalar salyqtan bosatylady. Budan bólek, tranzıt arqyly ushatyndardyń Malaızııada bolý ýaqyty 12 saǵattan aspasa, olarǵa da bul salyqtyń qatysy joq.
Malaızııa týrızm damyǵan elderdiń biri sanalady. Byltyr Koroldikke 25,8 mln sheteldik týrıst saıahat jasaǵan.
