Mal jaıýǵa berilgen 12 mln gektar jerde tórt túlik joq - mınıstrlik

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstrligi ǵaryshtyq monıtorıng nátıjesinde paıdalanylmaı jatqan 1 mln gektar egistik jerdi anyqtady, dep habarlaıdy QazAqparat tilshisi.

«Jer paıdalaný monıtorıngi boıynsha 1 mln gektar paıdalanylmaıtyn egistik jerler, 817 myń gektar egistik jerlerdi maqsatsyz paıdalaný, 12 mln gektar maly joq jaıylymdyq alqaptar anyqtaldy. Paıdalanylmaıtyn jaıylymdyq jerler Almaty oblysynda – 1,3 mln gektar, Aqtóbe oblysynda - 1,3 mln gektar, Qaraǵandy oblysynda - 1,3 mln gektar», - dep toqtaldy Aeroǵarysh komıtetiniń tóraǵasy Baýbek Oralmaǵambetov OKQ-da ótken brıfıngide.

Onyń aıtýynsha, paıdalanylmaıtyn jatqan egistik jerler Qostanaı (277 myń gektar), Soltústik Qazaqstan (126 myń gektar) jáne Abaı oblystarynda (90 myń gektar) kóp anyqtalǵan.

Sonymen qatar spıker byltyr Qazaqstan boıynsha 5 683 ruqsat etilmegen qoqys obektileri anyqtalǵanyn aıtty.