Mal urlyǵyna tosqaýyl qoıý qıyn ba
ASTANA. QazAqparat - Senatorlar Úkimet basshysy Baqytjan Saǵyntaevtyń atyna joldaǵan depýtattyq saýalda elimizdegi mal urlyǵyna tosqaýyl qoıýǵa baılanysty qatań sharalar qabyldaýdy surady, dep habarlaıdy QazAqparat.
«Depýtattyq saýalǵa buqaralyq aqparat quraldarynda kóptegen jarııalanymdar jáne áleýmettik jelilerde bóten múlikti urlaýdyń jıilep ketken faktileri týraly talqylaý sebep bolyp otyr. Qylmys deńgeıiniń ósýi azamattardyń belgili bir narazylyǵyn týdyratyny jalpyǵa málim. Bótenniń múlkin urlaý, atap aıtqanda páter urlyǵy men mal urlyǵy erekshe alańdaýshylyq týdyrady. Atalǵan qylmys túrleri azamattardyń jeke aýmaǵyna jáne turǵyn úılerine enýimen baılanysty, bul materıaldyq zııan keltirýden basqa azamattardyń densaýlyǵyna moraldyq-psıhologııalyq zııan keltiredi», - dedi depýtat Nurlan Qylyshbaev Senattyń jalpy otyrysynda.
Osy oraıda, ol mal urlyǵynan bolǵan shyǵyn qomaqty somaǵa jetkenin atap ótti.
«Búgingi tańda Almaty oblysynda óte kúrdeli jáne úreıli jaǵdaı qalyptasyp otyr. 2018 jyly tirkelgen qylmystar sany boıynsha bul aımaq respýblıka kóleminde ekinshi orynda, al Almaty qalasy birinshi orynda tur. Sonymen qatar, ótken jyldyń qorytyndysy boıynsha Almaty oblysynyń aýmaǵynda 17 350 bóten múlikti urlaý faktisi tirkeldi. Bul rette atalǵan qylmystardyń ashylý kórsetkishi ótken jyly tek 32 paıyzdy qurady. Sonyń ishinde 1 338 mal urlyǵy tirkelip, onyń 44 paıyzy ashyldy. Keltirilgen materıaldyq shyǵyn 157 mıllıon teńgeni qurady, 1 843 bas mal urlandy. Oblys boıynsha 422 adam ustalyp, onyń 239-y buryn osy urlyq jasaǵany úshin tartylǵan. Árbir úshinshi mal urlyǵy jeke aýlada jasalǵan», - dep naqtylady N. Qylyshbaev.
Onyń atap ótýinshe, urlyqqa qarsy is-qımyldyń tıimsizdigi tek polıtsııa qyzmeti ǵana emes, memlekettik jáne jergilikti atqarýshy organdardyń, qoǵamnyń kúsh-jigerin talap etetin kúrdeli máselelerdiń biri bolyp otyr.
«Mal basyn esepke alýdy, tańbalaý, syrǵalaý,chıpteý jumystaryn kúsheıtý, veterınarııalyq anyqtamalar men pasporttardy berýdi qatań baqylaýǵa alý sekildi qajetti sharalar qabyldaý kerek. Tıisti organdar kúdiktilerge qatysty neǵurlym qatań bultartpaý sharalaryn qoldaný qajet. Kóp jaǵdaıda kúdiktilerge qatysty «eshqaıda ketpeý týraly qolhat» nemese «kepil» qoldanylady. Osy sebepten urlyq jasaýǵa negizdelgen kúdiktilerdiń 5 myńnan astamy bostandyqta qalýda», - dedi depýtat.
Osyǵan baılanysty senator Úkimet basshysynan tıisti uıymdastyrýshylyq, profılaktıkalyq, túsindirý men basqa da sharalardy kúsheıtýge baǵyttalǵan tıisti ózgerister men tolyqtyrýlardy ázirleý jáne bastamashylyq jasaý jóninde tapsyrma berýdi surady.
