Mal urlyǵymen aınalysqan 29 qylmystyq top ustaldy
ASTANA. QazAqparat - Elimizdiń aýmaǵynda júrgizilgen jedel aldyn alý sharasy barysynda urlanǵan 347 bas mal ıelerine qaıtaryldy. Bul jaıynda QR Іshki ister mınıstrliginiń resmı ókili Nurdildá Oraz málim etti, dep habarlaıdy QazAqparat tilshisi.
Onyń aıtýynsha, ishki ister organdary respýblıka aýmaǵynda mal urlyǵyn ashý jáne onyń aldyn alý tıimdiligin arttyrýǵa baǵyttalǵan ekikúndik "Mal urlyǵy" sharasyn ótkizgen.
"Polıtsııa qyzmetkerleri mal urlaǵany úshin 29 qylmystyq top, 179 adam ustalyp, buǵan deıin oryn alǵan 129, onyń ishinde ótken jyldardaǵy 31 mal urlyǵy ashyldy. 122 jylqy, 63 iri qara men 172 usaq mal ıelerine qaıtaryldy. Utqyr toptar 1500-den astam kólikti tekserip, qujatsyz mal men et ónimderin tasymaldaýdyń 335 deregin ashty. Mal men et ónimderin ótkizý jáne satý orgyndaryn tekserip, urlanǵan maldy jáne etti satqan 52 adamdy anyqtady", - dedi N.Oraz.
Máselen, resmı ókil dereginshe, Qaraǵandy men Pavlodar oblystarynyń polıtsııa qyzmetkerleri 10 mal urlyǵyna qatysy bar 3 adamnan turatyn topty ustaǵan. Al Túrkistan oblysynda jyl basynan beri 3 ret mal urlyǵyn jasaǵan urylar qolǵa tústi.
"Aqtóbe oblysynda polıtsııa qyzmetkerleri 2018 jyldyń shildesinde "Ushqyrsor" jaılaýynan 26 jylqy urlaǵan jergilikti turǵynnyń qylmysyn áshkereledi. Satyp alýshy men qylmys kýágeri anyqtaldy. Mal urlyǵynyń aldyn alý jáne ashý jumysy jalǵasatyn bolady", - dedi ol.
