Mal urlyǵy: Katonqaraǵaı aýdanyna ІІM men Bas prokýratýradan tekserý toby barady
ASTANA. KAZINFORM – Shyǵys Qazaqstan oblysynyń Katonqaraǵaı aýdany Shyńǵystaı aýylyndaǵy mal urlyǵynyń daýyna baılanysty Іshki ister mınıstrligi men Bas prokýratýranyń ókilderinen quralǵan top tekserýge barady. Bul týraly Іshki ister mınıstrliginiń Májilis depýtattarynyń saýalyna joldanǵan jaýapta aıtylǵan.
Mınıstrliktiń jaýabynda Shyńǵystaıdaǵy mal urlyǵy týraly áleýmettik jelini dúrliktirgen vıdeo qoldan uıymdastyrylǵany aıtylǵan.
- Qańtar aıynda Qatonqaraǵaı aýdany, Shyńǵystaı aýyly turǵyndarynyń ótinishi boıynsha tıisinshe jedel den qoıý qamtamasyz etildi. Oblystyq polıtsııa departamenti basshylyǵy jáne arnaıy jedel-tergeý toby oqıǵa ornyna baryp, tıisti tekseris júrgizdi. Olardyń ýájderi boıynsha Qazaqstan Respýblıkasy Qylmystyń kodeksiniń 188-1-baby boıynsha sotqa deıingi tergeý bastaldy jáne júrgizilýde. Onyń sheńberinde mal urlyǵyn jasaýda kúdik boıynsha osy aýdannyń eki turǵyny ustaldy. Sottyń sanktsııasymen olar qamaýǵa alyndy. Odan basqa, tergeý barysynda úsh aýyl turǵyny qoǵamdyq rezonans týdyrý úshin óz aýyldasyn (K.S. Kabdrasılov) zańsyz bas bostandyǵynan aıyryp, ómirine qaýip tóndirip, ony jer daýyna baılanysty kelispeýshilikteri bolǵan jergilikti kásipkerdiń malyn urlaýǵa qatystylyǵy týraly beıneúndeý jazýǵa májbúrlegeni anyqtaldy. Bul fakti boıynsha da Qazaqstan Respýblıkasy QK-niń 126-baby boıynsha sotqa deıingi tergeý júrgizilýde, kúdikti úsh adam sot sanktsııasymen qamaýǵa alyndy, - dep jazady birinshi vıtse-mınıstri Baýyrjan Álenov.
Aýdandaǵy ahýaldyń aq-qarasyn anyqtaý úshin Astanadan arnaıy top attanbaq.
- Zań jáne Tártip» qaǵıdatyn sapaly iske asyrý jáne qamtamasyz etý sheńberinde jaqyn arada Shyǵys Qazaqstan oblysy Qatonqaraǵaı aýdanyna Іshki ister mınıstrligi men Bas prokýratýranyń qyzmetkerlerinen qurylǵan top qosymsha tekserýdi uıymdastyrý úshin jiberiledi, - dep jazylǵan jaýapta.
Buǵan deıin Kazinform Katonqarǵaaı aýdanyndaǵy mal urlyǵy qalaısha Májilis minberine deıin jetkenin jazǵan edi.