Mal urlyǵy, qarý, nasybaı: Túrkistan oblysynyń polıtseıleri 1 aptada birneshe qylmysty ashty
TÚRKІSTAN. KAZINFORM – Saıram aýdanynyń turǵynynan nasybaı ázirleıtin 15 tonna shıkizat pen daıyn temeki zaty bar 40 qap jáne 3 qoldan jasalǵan stanok tárkilendi. Bul týraly oblystyq polıtsııa departamenti bastyǵynyń orynbasary Qurmanbek Sahov málimdedi.
Túrkistan oblysy polıtsııa departamentiniń jedel ýákilderi birqatar qylmys pen quqyq buzýshylyqty anyqtady. Atap aıtar bolsaq, jedel-izdestirý is-sharalarynyń nátıjesinde krımınaldyq polıtsııa qyzmetkerleri Keles aýdanynda mal urlyǵymen aınalysqan kúdiktilerdi qolǵa túsirdi. Úsh jergilikti turǵyn men satyp alýshy qamaýǵa alyndy. Olardyń mal urlyǵynyń 3 faktisine qatysy bar ekeni belgili boldy. Kúdiktilerden iri qara men «Hyundai» markaly avtokólik tárkilendi.
Al, uıymdasqan qylmysqa qarsy kúres basqarmasy jasyryn nasybaı óndirip kelgen Saıram aýdanynyń turǵynyn ustady. Onyń úıinen «nasybaı» óndiretin tseh tabyldy. Sondaı-aq «nasybaı» óndirýge arnalǵan 15 tonna shıkizat pen daıyn temeki zaty bar 40 qap jáne 3 qoldan jasalǵan stanok tárkilendi.
Sonymen qatar uıymdasqan qylmysqa qarsy kúres basqarmasy Saýran aýdanynda qıyrshyq tasty zańsyz óndirýmen aınalysatyn adamdar tobyn quryqtady. Quqyq buzýshylardyń eki júk kóligi men júk tıegishi aıyppul turaǵyna qoıyldy.
Esirtki qylmysyna qarsy is-qımyl basqarmasynyń qyzmetkerleri Túrkistan qalasynda «sıntetıkalyq esirtkilerdi» saqtaý men ótkizý faktisiniń jolyn kesti. Jedel ýákilder kúdikti retinde Almaty qalasynyń turǵynyn ustady, odan 3 esirtki oramasy tárkilendi. Kúdiktiniń jasyryp ketken 25 dana esirtkileri de der kezinde tabyldy. Adam densaýlyǵyna qaýip tóndiretin asa zııan sıntetıkalyq preparattyń jalpy salmaǵy shamamen 50 gramm quraıtyn «mefedron» bolyp shyqty.
Ekstremızmge qarsy is-qımyl basqarmasynyń qyzmetkerleri Ordabasy aýdanynda iri kólemde esirtki zattaryn saqtaǵan kúdiktini ustady. Ony tintý kezinde jalpy salmaǵy 9 kelige jýyq «marıhýanany» tárkilendi.
Sonymen qatar polıtseıler Túlkibas aýdanynyń turǵynynan pıstolet pen 15 oq-dári tárkiledi.
«Qazirgi ýaqytta barlyq fakti boıynsha sotqa deıingi tergeý amaldaryn júrgizilip jatyr. Túrkistan oblysynyń aýmaǵynda qylmystardy ashý jáne qoǵamdyq tártipti qamtamasyz etý baǵytyndaǵy júıeli jumystar jalǵasýda», - dedi polıtsııa polkovnıgi Qurmanbek Sahov.
