Mal urlyǵy: 460-qa jýyq kúdikti ustalyp, 3 myńnan astam mal ıelerine qaıtaryldy
ASTANA. KAZINFORM — Jyl basynan beri Qazaqstanda mal urlyǵyna qatysty 460-qa jýyq kúdikti ustalyp, zańdy ıelerine 3 myńnan astam mal qaıtaryldy. Іshki ister mınıstrliginiń málimetinshe, olardyń arasynda 107 qylmystyq toptyń múshesi bar. Bul týraly Polisia.kz jazdy.
Vedomstvonyń málimetinshe, jyl basynan beri polıtsııa mal urlyǵyna qatysy bar 460-qa jýyq adamdy ustalǵan. Olardyń ishinde 107 qylmystyq toptyń músheleri bar. Zańdy ıelerine úsh myńnan astam mal qaıtarylǵan.
— Mal urlyǵy aýyl turǵyndary úshin eń ózekti máselelerdiń biri bolyp qala beredi. Sebebi kóptegen otbasy úshin mal sharýashylyǵy negizgi tabys kózi. Sondyqtan mal urlyǵymen aınalysatyn qylmystyq toptardy anyqtaýǵa jáne olardyń jolyn kesýge erekshe nazar aýdarylýda. Tamyz aıynda Batys Qazaqstan oblysynda polıtsııa qyzmetkerleri jylqy jáne iri qara mal urlyǵyna qatysty birqatar qylmys jasady degen kúdikpen eki adamdy ustady, — delingen habarlamada.
Olardyń toǵyz qylmys epızodyna qatysy bary anyqtaldy. 15-ten astam mal basy urlanǵan. Kúdiktiler jaıylymda júrgen maldy urlap, ony shalǵaı eldimekenge aıdap aparyp, sonda soıǵan. Al etti keıinnen satý maqsatynda Aqtóbe oblysyna jetkizip otyrǵan. Kúdiktiler qamaýǵa alyndy.
Aýyl turǵyndaryna maldy qaraýsyz qaldyrmaý, baqylanatyn jaıylym uıymdastyrý, GPS-trekerlerdi paıdalaný, sondaı-aq maldy ýaqtyly tańbalaý, chıpteý jáne esepke alý usynylady. Mundaı sharalar urlyq táýekelin azaıtýǵa, al qylmys jasalǵan jaǵdaıda urlanǵan maldy izdep tabýǵa múmkindik beredi. Polıtsııa mal urlyǵynyń aldyn alý jáne ashý, azamattardyń múlkin qorǵaý, sondaı-aq kinálilerdi zańda belgilengen jaýapkershilikke tartý baǵytyndaǵy júıeli jumysyn jalǵastyrady.
Aıta keteıik, BQO-nyń Shyńǵyrlaý aýdanynda polıtsııa qyzmetkerleri mal urlyǵynyń birneshe deregin ashty. Jedel-izdestirý is-sharalary barysynda eki adamnyń mal urlyǵynyń toǵyz deregine qatysy bar ekeni anyqtaldy. Aldyn ala málimet boıynsha, kúdiktiler birneshe aı ishinde bes iri qara men alty jylqyny urlaǵan.
