Mal soıý alańdaryn qamtamasyz etý jergilikti atqarýshy organdardyń mindeti - Ó. Shókeev
ASTANA. Qańtardyń 25-i. QazAqparat /Rýslan Ǵabbasov/ - Elimiz aýmaǵynda mal soıý alańdarymen qamtamasyz etý turǵysyndaǵy jumystar tıisti deńgeıde atqarylmaı jatyr. Bul týraly búgin Úkimette ótken selektorlyq keńeste Aýyl sharýashylyǵy mınıstri Aqylbek Kúrishbaev málim etti,
dep habarlaıdy QazAqparat.
«Veterınarlyq týraly» zańǵa ózgerister men tolyqtyrýlar engizilgenin eske salyp ótken mınıstr osyǵan baılanysty el aýmaǵynda satýǵa arnalǵan mal ónimderi mamandandyrylǵan arnaıy oryndarda soıylýy tıis ekenin, ıaǵnı veterınarlyq-sanıtarlyq normalarǵa sáıkes júzege asyrylýy kerektigin atap ótti.
Onyń aıtýynsha, bul et óniminiń qaýipsizdigine negizdelgen jáne mal sharýashylyǵy ónimin saýdalaý úshin qoıylyp otyrǵan halyqaralyq talaptar ekenin jetkizdi. Jańa zań jobasy boıynsha óńirlerde mal soıýǵa arnalǵan alańdar qurylysynyń múmkindikteri qarastyrylǵanyna toqtalǵan ol, bul nysandardyń qurylysy boıynsha usynystar aımaqtarǵa jiberilgenin aıtty. «Zań qabyldanǵannan beri 5 aı ýaqyt ótti. Al problemalar sheshilmegen kúıde qalýda», dedi A. Kúrishbaev.
Onyń sózine qaraǵanda, mal soıý alańdarymen qamtamasyz etý sharalary Shyǵys Qazaqstan men Mańǵystaý oblystarynda ǵana júzege asyrylǵan. «Al qalǵan oblystarda jumystar tıisti deńgeıde júrgizilmeı jatyr», dedi A. Kúrishbaev.
Osyǵan baılanysty ol jergilikti atqarýshy organdarǵa bıylǵy jyldyń mamyr aıyna deıin bul jumystardy atqarý mindeti tapsyrylǵanyn aıtty. Óz kezeginde Úkimet basshysynyń birinshi orynbasary Ó. Shókeev bul másele búginde mańyzdy ekenin aıtyp ótti. Mal sharýashylyǵyn damytý úshin eksporttyq naryqty keńeıtý kerektigin jetkizgen ol, «bul úshin mal mamandandyrylǵan pýnktterde soıý kerek. Alaıda zań qabyldanǵannan beri 5 aı ýaqyt ótti. Sonymen qatar biz ákimdikterge taǵy 5 aı ýaqyt beremiz. Sebebi, Keden odaǵy jumys isteýde. Bul talap oryndalmasa, Reseıge etti eksporttaý júzege asyrylmaıdy», dedi.
Ó. Shókeev mal soıý alańdaryn qamtamasyz etý jergilikti atqarýshy organdarynyń mindeti ekenin aıtty.
