Mal soıyp júrgenime 30 jylǵa jýyqtady — Aqtóbedegi jalǵyz qasapshy áıel
AQTÓBE. KAZINFORM – Kúnsulý Shamanova men onyń janyndaǵy 10-nan astam qasapshy soǵym ýaqytynda kúnine 100-130 bas iri qara soıady. Ol Aqtóbedegi jalǵyz qasapshy áıel. Kazinform tilshisi er adamdarmen teń jumys istep júrgen óz isiniń bilgirimen sóılesip keldi.
Kúnsulý Shamanova 2007 jyldan beri Aqtóbe qalasyndaǵy mal bazarynda qasapshy bolyp jumys isteıdi.
Sodan beri arada 20 jylǵa jýyq ýaqyt ótti. Bul qasapshylyq kásiptiń basy emes. Ol buǵan deıin de et kombınatynda eńbek etken.
— Mektep bitirip, tehnıkalyq ýchılışege oqýǵa tústim. Keıin kondıterlik fabrıkada jumys istedim. Bul meniń eńbek jolymnyń basy bolatyn. Birde qurbymmen et kombınatyna bardym. Onda bizge aldymen mal soıýdy úıretti. Úsh kún tájirıbeden ótken soń basshylyqqa «jumys isteı almaımyn» dep aryz jazyp, ketpek boldym. Biraq aryz qabyldanbaı, basshymyz «qolyńnan keledi» dep jigerlendirip jiberdi. Sóıtip synaq merzimi bitpese de birden jumysqa qabyldandym. Ózimniń ákem de bir kezderi qasapshy bolǵan. Ol óz áńgimelerinde jumys istegen jyldardy eske alyp otyratyn. Maǵan «adam eshýaqytta jumystan qoryqpaýy kerek, kerisinshe jumys sizderden qoryqsyn» dep aıtatyn. Sol sózder meniń jadymda jattalyp qalypty, — dedi qasapshy Kúnsulý Shamanova.
Joldasymen birge ul men qyz ósirgen baqytty ana Kúnsulý Shamanova búginde 64 jasqa keldi. Zeınetke shyǵyp ketse de óziniń kásibin tastaǵan emes.
Kún saıyn tańerteń saǵat 9:00–de ózge qasapshylarmen qatarǵa turyp, mal soıady.
Munda tórt túlik arnaıy tizbek boıynsha soıylyp, jilikteledi. Aldymen iri qarany baýyzdaıdy, keıin sıraǵyn syndyryp, terisin sypyrady.
— Bizde 10-nan astam qasapshy jumys isteıdi. Eń úlkeni men jáne jalǵyz áıelmin. Bári de apa dep syılap, qurmet kórsetedi. Biraq jumystyń aty jumys. Ózim saty arqyly joǵary kóterilip, iri qaranyń terisin sypyramyn. Ári qaraı ishek-qarnyn túsiredi, bólshekteıdi. Dál osy jerde zerthana da bar. Munda mamandar tekserip, tońazytqyshqa, ári qaraı et bazaryna jiberýge mór basady. Qarasha-jeltoqsan aılary — soǵym ýaqyty. Ol kezde 100-130 bas iri qara soıamyz. Sol kezde tańnan keshke deıin mal soısaq, sál saıabyrsyǵanda jumysymyz túske deıin de aıaqtalyp jatady, — dedi qasapshy.
Kúnsulý Shamanovany bári de Katıa apa dep atap ketken. Sebebi ujymdaǵy eń úlkeni. Ári keıingi kelgenderge únemi baǵyt-baǵdar berip, kómektesip otyrady.
— Ujym óte uıymshyl ári qamqor. Bári de syılaıdy. Eń birinshi kelgende jumys qıyn bolyp kórinýi múmkin. Biraq pyshaq qaıraýdy, eki qolmen birdeı jumys isteýdi meńgerse, úırenip ketedi. Pyshaq ótkir bolsa, kóp kúsh túspeıdi. Soǵan qaramastan qoldyń qaıratty bolǵany jaqsy. Ár qasapshyda úsh pyshaq bolady. Ony aldymen arnaıy apparatta qaırap beredi. Al jumys barysynda árkim beline baılaǵan qaıraǵyn paıdalandy. Ózimniń bir qaıraqty qoldanyp júrgenime 30 jylǵa jýyqtapty, — dedi ol.
Qasapshynyń aıtýynsha, er adamdardyń mal soıyp, ony jiliktep úırengeni durys. Kóbi jalqaýlyq tanytyp, bul jumystan qashady. Ózi úırengen isin qıyn kórmeıdi. Jaz ben kúzde baqsha baptap, tosap qaınatady, qııar tuzdaıdy. Ári tabıǵat aıasynda tynyqqandy unatady.
— Otbasymmen, bala-shaǵammen ýaqyt ótkizgen unaıdy. Tamaq istegendi jaqsy kóremin. Qyzyma, kelinime úıretemin. Áıel zaty bolǵan soń óz-ózime kútim de jasaımyn. Al qasapshylyq kásipke qazir áıelder kelmeıdi. Negizi áıel adamǵa bul qıyndaý jumys. Al ózim úırendim, sosyn da jeńil sııaqty. Er adamdardyń arasynda er adam sııaqty júresiń, keıde áıel ekenińdi umytyp ketesiń. Qıyndyqtyń bárin jeńý úshin shydamdylyq kerek, — dedi Kúnsulý Shamanova.
Jumysqa kelgen kezde bar bilgenin úıretken Katıa apaǵa alǵys aıtatyndar kóp. Bir ǵana mal bazarynda emes, oǵan deıin aýdandardaǵy et kombınattarynda da eńbek etip, tizbekte turýdy úıretti.
— Men jumysqa 13 jyl buryn keldim. Alǵashqy kezde Katıa apa men ózge de aǵa býyn qasapshylyqtyń qyr-syryn úıretti. Qazir mal baýyzdaýdan bastap, ony shaýyp, jilikteýdi de meńgerip aldym. Jol siltegen, kómegin bergeni úshin rızamyz. Apaı pyshaq ustaýdan bastap úıretti, — deıdi qasapshy Temirhan Isataev.
Aıta keteıik, Kazinform buǵan deıin NEET sanatyndaǵy jastar týraly jazdy. Byltyr Aqtóbe oblysy boıynsha 4 801 adam tizimge ense, bir jylda shamamen myń adamǵa azaıǵan. Kóbi Aqtóbe qalasynda.