Mal sharýashylyǵynda shyǵynnyń 70 paıyzy jemshópke ketedi – depýtat
«Mal sharýashylyǵynda shyǵynnyń 70 paıyzy jemshópke ketedi. Onyń ústine baǵanyń aıtarlyqtaı óskeni baıqalyp otyr. Sondyqtan mal sharýashylyǵy salasyn sýbsıdııalaýdy tómendetý qısynsyz. Kerisinshe, qoldaý kólemin ulǵaıtyp, otandyq jemshóp jelisin qurý kerek. Odan bólek, elimizdegi jemshóp qoryna qus sharýashylyǵy mamandary da alańdaýly. Bizge aýyl sharýashylyǵy ónimin óndirýshiler óz problemalarymen júginedi. Mysaly, Pavlodar oblysyndaǵy «Turkey PVL» JShS kúrketaýyq óndirisin sýbsıdııadan alyp tastaǵanyna narazylyq bildirip otyr», - dedi Asqarbek Úısimbaev Májiliste ótken dóńgelek ústel barysynda.
Sondaı-aq, halyq qalaýlysy keıbir sýbsıdııany qysqartýǵa qarsy shyqty.
«Aýyl sharýashylyǵy mınıstrligi asyl tuqymdy buqalardy satyp alý sýbsıdııasyn alyp tastaýdy usynyp otyr. Atalǵan shara aýylda mal ónimdiliginiń tómendeýine ákeledi. Sondyqtan atalǵan sýbsıdııa túrin saqtaý qajet. Sol sııaqty tuqym sharýashylyǵy salasyn sýbsıdııalaýdy toqtatpaǵan jón. Óıtkeni, atalǵan sharýashylyqta keıbir tuqym túrlerin saqtap qalý mańyzdy. Tuqym óndirýshilerdi qoldaý men onyń qoljetimdiligin arttyrýda memleketten sýbsıdııa qajet-aq», - deıdi ol.
Buǵan deıin Erbol Qarashókeev sýbsıdııalaý protsesiniń elektrondy formatqa kóshetinin aıtqan edi.
Atalǵan jıynda QR Parlamenti Májilisiniń depýtaty, agrarlyq máseleler komıtetiniń múshesi Asqarbek Úısimbaev otandyq sút óndirisiniń damýyna alańdaýshylyq bildirdi.
Onyń aıtýynsha, Qazaqstanda 3 mln tonna sút ónimderiniń tapshylyǵy bar.
