Mal sharýashylyǵynda azyq bazasynyń álsizdigi aıqyn seziledi - A. Kúrishbaev
ASTANA. 8 qarasha. QazAqparat QazAqparat /Qanat Mámetqazyuly/ - Mal sharýashylyǵynda azyq bazasynyń álsizdigi aıqyn seziledi. Búgin Parlament Májilisinde ótken Úkimet saǵatynda Aýyl sharýashylyǵy mınıstri Aqylbek Kúrishbaev osylaı málim etti.
«Qazir biz shartty mal basyna bar bolǵany 14 tsentner azyq birligin óndiremiz. Bul zootehnıkalyq normadan 2,3 ese tómen. Aýyspaly egistegi azyqtyq daqyldardyń úles salmaǵy ǵylymı negizdelgen 30 paıyzdyń ornyna bar-joǵy 11 paıyzdy quraıdy. Sonymen qatar, olardyń shyǵymy tómen jáne ósiriletin azyqtyq daqyl túrleri shekteýli»,- dedi A. Kúrishbaev.
Mınıstrdiń aıtýynsha, elimizdegi jaıylymdyq jerlerdiń jaǵdaıy da máz emes. Máselen, qazir jaıylymnyń 48 mln. gektary tozǵan. Bul 1991 jylǵy kórsetkishten eki ese kóp jáne olardy qalpyna keltirý jumysymen eshkim aınalyspaıdy. Daqyldyq jaıylymdy qurý máselesi umyt qalǵan.
Bul rette atalǵan problemalardy sheshý úshin eń aldymen azyq óndirisi kólemin zootehnıkalyq normalarmen bekitilgen deńgeıge jetkizý mindeti qoıylyp otyr. Bul úshin egin sharýashylyǵyn ártaraptandyrý aıasynda aýyspaly egis kólemindegi azyqtyq daqyldardy 2 esege ulǵaıtý qajet. Budan bólek azyqtyq daqyldardyń tuqym sharýashylyǵyn damytý kerek. Bul rette 2014 jyly elıtaly tuqym sharýashylyqtar júıesin damytý jáne jyl saıyn 11,7 myń tonnaǵa jetkizý kózdelgen. Sondaı-aq, qurama jem óndirisin qalypqa keltirip, olardyń jyl saıynǵy óndiris kólemin 1 mln. tonnaǵa jetkizý qajet.
