Mal sharýashylyǵyn damytýda elimizdegi aýqymdy múmkindikter paıdalanylmaı otyr - AShM jaýapty hatshysy E.Aman
ASTANA. Shildeniń 30-y. QazAqparat /Rýslan Ǵabbasov/ - 1990 jylmen salystyrǵanda 2000 jylǵa qaraı mal basynyń sany 2 esege qysqardy. Bul týraly búgin Astanada ótip jatqan 1 Halyqaralyq mal sharýashylyǵy forýmynda Aýyl sharýashylyǵy mınıstrliginiń jaýapty hatshysy Evgenıı Aman málim etti.
«Ekonomıkalyq quldyraý barysynda mal sharýashylyǵy salasy aýyr kezeńderdi bastan ótkerdi. Jáne sonyń saldarynan mal basy negizinen jeke jáne úı sharýashylyqtarynda shoǵyrlandy. Mal sharýashylyǵy men qus fabrıkalarynyń ydyraýy esebinen mal basynyń jáne qustardyń barlyq túrleriniń sany kúrt tómendeı tústi. 1990 jylmen salystyrǵanda, 2000 jylǵa qaraı mal basynyń sany eki ese qysqardy. Osyǵan sáıkes, mal sharýashylyǵy ónimderi óndirisiniń kólemi de azaıdy», - dep atap ótti jaýapty hatshy.
«Bul sala óziniń eksporttyq áleýetinen aıyryldy, sondaı-aq ishki qajettilikti qamtamasyz etýmen shekteldi. Al qus eti boıynsha elimiz eksportqa táýeldi boldy», - dedi E.Aman.
Onyń aıtýynsha, qazirgi ýaqyttyń talabyna sáıkes búginde jaıylymdar men mal sharýashylyǵyn saqtap qalǵan aýyl sharýashylyq kásiporyndary qazirgi kezde ekonomıkalyq turǵydan alǵanda turaqty damyp keledi.
«Atap aıtqanda, osy sharýashylyqtardy elimizdiń halqy turaqty túrde jyl boıy eńbekpen qamtylǵan. Bul jerlerde eńbek ónimdiligi, eńbekaqy joǵary deńgeıde. Sondaı-aq osy jerlerde áleýmettik problemalar da sheshilýde», - dedi ol.
E.Aman atap ótkendeı, búginde barsha aýyl sharýashylyǵy ónimi men azyq-túlik taýarlary eksportynyń jalpy kóleminde astyq pen unnyń úlesi 78 paıyzdy qurap otyr.
«Osy turǵydan aıtarymyz, mal sharýashylyǵyn damytý úshin elimizdegi aýqymdy múmkindikter paıdalanylmaı otyr», - dep toqtaldy jaýapty hatshy.
