Mal sharýashylyǵyn damytý maqsatynda Qostanaıǵa 36 myń iri qara mal ákelinbek
Jıynǵa oblystyq aýyl sharýashylyǵy basqarmasynyń, aýmaqtyq veterınarlyq baqylaý ınspektsııasynyń, veterınarlyq zerthananyń ókilderimen qatar aýyl sharýashylyǵy taýar óndirýshileri qatysty.
Bıyl Qostanaı oblysyna shetelderden 2 186 qara mal ákelindi. Kelesi jyly mal sharýashylyǵyn damytýdyń jańa baǵdarlamasy sheńberinde bul kórsetkish ondaǵan esege ulǵaıtylmaq, ıaǵnı, 36 000 iri qara satyp alynady. Osy tusta túliktiń fızıologııalyq jaǵdaıy basa nazarda bolýy tıis.
«Qostanaı oblysynda aýsyl aýrýyna qarsy ekpe egilmeıdi. Sondyqtan ákelinetin qara maldy arnaıy mártebesi bar óńirlerge tasymaldaý kerek. Qara mal kóbine Reseı Federatsııasynan tasymaldanady. Máselen, Orynbor, Samara, Qorǵan, Chelıabi oblystarynda aýsylǵa qarsy ekpe jasalady. Biraq, bul óńirlerden Qostanaıǵa mal ákelýge tyıym salynǵan. Alaıda, iri qara maldardy elimizdiń ońtústik oblystaryna tasymaldaýǵa bolady», - dep túsindirdi QR AShM veterınarlyq baqylaý jáne qadaǵalaý komıteti aýmaqtyq ınspektsııasynyń bólim basshysy Láıla Ańsabaeva.
Eger kásipkerler basqa elderden qara mal jetkizgisi kelse, onda onyń mártebesi týraly QR AShM ınternet-resýrsynan qarap alýǵa bolady. Máselen, ol tizimde dermatıt, sibir jarasy, aýsyl tárizdi epızotııalyq jaǵdaı jóninde málimetter bar. Veterınarlyq baqylaýdyń aýmaqtyq ınspektsııasy, tıisti erejelerdi saqtamaýdyń saldary búkil elimizdegi kásipkerlerge zardabyn tıgizýi múmkin ekendigin eskertedi.
Qostanaılyq sharýalar ekpege baılanysty máselelerdiń kóptigin aıtyp, dabyl qaǵady.
«Qazirgi ýaqytta mal sharýashylyǵynda másele degen shash etekten. Muny jasyryp kerek emes. Keńes úkimet tusyndaǵy mal basymen salystyrǵanda búgin qoldaǵy iri qaranyń sany túkke turǵysyz. Tipti, biz ózimizdi sútpen tolyq qamtı almaı otyrmyz. Sýbsıdııalaýdyń erejesi jylyna birneshe ret ózgeredi. Taýar óndirýshiler olardy túsinip úlgirmeıdi,-deıdi «Turar» JShS dırektory Qaırat Ospanov.
«Vaktsınatsııa máselesi de túsiniksiz. Bireý ekpe jasatsa, endi biri jasatqysy kelmeıdi. Al dári ekse, mal bitken aýyra bastaıdy. Nodýldik dermatıtke qarsy egilgen vaktsınatsııadan keıin osyndaı jaǵdaı bolǵan».
Oblystyq aýmaqtyq ınspektsııanyń jetekshisi Orazbek Batyrbekov elimizde halyqaralyq epızootıkalyq bıýro maquldaǵan vaktsınalar ǵana salynatyndyǵyn aıtady. Onyń áseri ártúrli. Ony aýrý retinde qabyldaýǵa áste bolmaıdy.
