Mal sharýashylyǵyn damytý baǵdarlamasy elimizdiń aýyl sharýashylyǵy áleýetin 1,5 ese arttyrady - QR Premer-Mınıstriniń birinshi orynbasary Ó.Shókeev

ANA. 3 shilde. QazAqparat /Marlan Jıembaı/ - Mal sharýashylyǵyn damytý baǵdarlamasy elimizdiń aýyl sharýashylyǵy áleýetin 1,5 ese arttyrady. Bul týraly búgin «QazAgro» holdınginiń jumysymen tanysqan QR Premer-Mınıstriniń birinshi orynbasary Ómirzaq Shókeev aıtty.

Atalǵan memlekettik baǵdarlamany tolyqqandy júzege asyrý barysynda 130 mlrd. teńge kóleminde qarjylandyrý qajet etiletindigin atap ótken onyń sózine qaraǵanda, jyl saıynǵy tabysy da óte joǵary bolyp, mıllıardtaǵan dollar kiris ákeletin bolady.

«Joba tolyq júzege asyrylǵannan keıin bizdiń aýyl sharýashylyǵymyz jylyna 1,5 mlrd. dollar kóleminde qosymsha tabys alady», - dedi ol.

Bul oraıda Ó.Shókeev mal sharýashylyǵyn damytý baǵdarlamasy aýqymdy tıimdilik ákeletindigin Elbasynyń aǵymdaǵy jyly Qazaqstan halqyna arnalǵan Joldaýynda atap ótken «60 myń tonna et eksportynyń quny 4 mıllıon tonna bıdaı eksportyna teń» degen sózimen dáleldedi.

«Bizdiń aýyl sharýashylyǵymyz jyl saıyn shamamen 8 mln. tonna astyq eksporttaıdy. Osy jobanyń esebinen biz aýyl sharýashylyǵynyń eksporttyq áleýetin bir jarym ese ulǵaıtamyz», - dedi Ó.Shókeev.