Mal sharýashylyǵymen aınalysatyn ár qazaqqa jer berilýi kerek - Almasbek Sadyrbaev

TALDYQORǴAN.QazAqparat - Asyl tuqymdy qoı ósiretin Almasbek Sadyrbaev mal sharýashylyǵymen aınalysatyn qojalyq ıelerine jer berilý kerek dep sanaıdy. Sebebi, qazir aýyl halqynda jer bolmaǵandyqtan, jastar qalaǵa kóship, bazar jaǵalap júr, - dep habarlaıdy QazAqparat tilshisi.

«Qanshama jastar qazir qalaǵa baryp, bazarda arba súıretip júr. Sebebi, aýylda jumys joq. Al qojalyq ıelerine jer berse, malyn ósirip, tirshiligin jasaıtyn edi, kásibin damytatyn edi. Bizde urpaqtar sabaqtastyǵy degen joq. Mysaly, qojalyq ıesine jer berilse, ol malyn, jerin, erteń urpaǵyna beredi. Solaı biz sharýashylyǵymyzdy damytamyz. Myna ulan ǵaıyr jerimiz, bos jatpaıtyn edi, ıgeriletin edi», - dedi «Shopan ata» qoı ósirýshiler qaýymdastyǵynyń tóraǵasy Almasbek Sadyrbaev.

Almasbek Sadyrbaev jer komıssııasynyń múshesi. Búgingi otyrysqa qatysty. Ol 17 jyldan beri shopan ata tólin asyldandyrýmen aınalysyp kele jatqan azamat. Búginde qoıdyń basyn 3 myńǵa jetkizgen. Asyl tuqymdy qoshqar men qoıdan bir mezette 5-7 embrıon alyp, asyl tuqymdy emes qoıǵa salý arqyly ýaqyt únemdeý múmkindigin, mal jaıýdyń tıimdi ádisin elimizde alǵashqylardyń biri bolyp ıgergen Almasbek Sadyrbaev. Biraq ol ózinde jer joq ekenin aıtady.

«Men qoıymdy qazir bireýge baqtyryp otyrmyn. Sebebi, mende jer joq. Ár qojalyq ıesine 500 gektardan jer berse, sharýashylyq damıtyn edi. Mysaly mende bastapqyda jer boldy. Biraq óte kishkentaı. Men balalarymnyń aýzynan jyryp salǵan qojalyǵymdy tastap, keń jer izdeýge kettim. Sebebi, maldy syıdyrý kerek. Búginde qoıdyń basy 3 myńǵa jaqyndap qaldy. Sondyqtan aýyl sharýashylyǵyn damytamyz desek, sharýalarǵa jer berip, qoldaý kerek», - dedi Almasbek Sadyrbaev.