Mal sharýashylyǵy salasyn damytýda, ásirese, veterınarlyq baqylaýdyń talapqa saı bolǵany kerek - E.Aman
ASTANA. Shildeniń 30-y. QazAqparat /Aıdar Ospanalıev/ - Elimizde mal sharýashylyǵy salasyna qatań veterınarlyq baqylaý ornatyp, maldy tek qasaphanalarda ǵana soıý qajet.
Elde oǵan qajetti jaǵdaılardyń barlyǵy jasalyp, tıisti qurylǵylar da satyp alynǵan. Bul týraly búgin Astanada ótip jatqan I Halyqaralyq mal sharýashylyǵy forýmynda Aýyl sharýashylyǵy mınıstrliginiń Jaýapty hatshysy Evgenıı Aman málim etti.
Atalmysh sharalar elde veterınarlyq qyzmetti jolǵa qoıý men malǵa qajetti dárilerdi egý jumystaryn talapqa saı júrgizý úshin kerek. Sondaı-aq ol mal júrgen jerlerdi de baqylaýǵa alyp, et tasymalyn qadaǵalap otyrýǵa múmkindik beredi. «Qoryta aıtqanda, biz qolǵa alyp otyrǵan sharalar veterınarlyq qyzmettiń barynsha joǵary deńgeıde júrgizilýine jaǵdaı jasaıdy», dedi Jaýapty hatshy.
Onyń aıtýynsha, bıylǵy jyl mal sharýashylyǵyna qatysty máseleler birshama kúrdelenip ketti. Túrli ınfektsııalyq aýrýlar shyǵyp jatyr, mal sharýashylyǵynda áli de bolsa sheshýin talap etip otyrǵan máseleler de barshylyq. «Bul bir jaǵynan aımaqtarda qorǵanys sharalarynyń da jetkiliksizdigin baıqatty. Alaıda bul bári bitti degen sóz emes. Kemshin tustardyń barlyǵyn jónge keltirýge bolady. Buny qazir bárimiz de jaqsy túsinip otyrmyz», dedi E.Aman.
