Mal sharýashylyǵy ónimderin óńdeý kásiporyndary tolyq qýatynda jumys istep jatqan joq – Úkimet

NUR-SULTAN. QazAqparat – Mal sharýashylyǵy ónimderin qaıta óńdeý kásiporyndary óndiristik qýatyn tolyq paıdalanyp otyrǵan joq. Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Jyl saıyn mal sharýashylyǵy ónimderin qaıta óńdeý jobalary júzege asyrylady. Degenmen mundaı kásiporyndar óndiristik qýatyn tolyq paıdalanyp otyrǵan joq. Osyǵan oraı aýyl sharýashylyǵy taýaryn óndirýshilerdi usaq óndirýshiler men qaıta óńdeýshi kásiporyndardy baılanystyratyn daıyndaýshy uıymdar jelisin qurýǵa yntalandyrý qajet», - dedi Álıhan Smaıylov.

Osy rette Úkimet basshysy Aýyl sharýashylyǵy, Saýda mınıstrlikteri men jergilikti atqarýshy organdardyń mindeti – ónimdi óndirýshi men óńdeýshige deıingi naryqtyń barlyq qatysýshylarynyń ıntegratsııasyna jaǵdaı jasaý ekendigin basa aıtty.