Mal sharýashylyǵyna bólingen mıllıardtar et baǵasyna nege áser etpeı jatyr — vıtse-mınıstr jaýaby

ASTANA. KAZINFORM — Aýyl sharýashylyǵy mınıstriniń orynbasary Erbol Tasjúrekov ortalyq kommýnıkatsııalar qyzmetinde ótken baspasóz máslıhatynda elde et jetkilikti bolǵanmen baǵa nege túspeı turǵanyn aıtty.

— Jyl saıyn mal sharýashylyǵyn damytýǵa mıllıardtaǵan qarajat bólingenimen, et óndirisi durys jolǵa qoıylmaǵandyqtan halyq bıýdjetten bólingen aqshanyń ıgiligin kóre almaı otyr. Óıtkeni et sońǵy jyldary qymbattap ketti. Osynyń sebebin qalaı túsindiresiz, — dep surady jýrnalıst.

Vıtse-mınıstr bul paıymmen kelispeıtinin aıtty.

— Qyzyl ettiń barlyq túri (mal men shoshqa eti) boıynsha elge qajetti kólemdi tolyq qamtamasyz etip otyrmyz. Sanmen aıtsaq, byltyr 430 myń tonna sıyr eti óndirildi. Al qajettilik 400 myń tonna bolǵan. Sonda tipti 30 myń tonnadaı etti eksporttaıtyn áleýetimiz bar. Biraq osymen toqtap qalmaı, mal sharýashylyǵyn damytýdyń keshendi josparyn qolǵa alyp jatyrmyz. Sonyń arqasynda aldaǵy 2-3 jyldyń ishinde et óniminiń kólemi arta túsedi, — dedi ol.

Erbol Tasjúrekov shekara syrtyndaǵy baǵa ishtegi baǵany ózimen birge joǵary jetelep turǵanyn atap ótti.

— Bul dınamıkany halyq dúken sórelerinen nege sezinbeı jatqanyna kelsek, irgeles elderge et eksporty úlken. Naqty aıtsaq, Ózbekstannan suranys joǵary. Óıtkeni bizdiń et básekede basymdyqqa ıe. Sáıkesinshe, ondaǵy baǵa bizdegi baǵadan aıtarlyqtaı joǵary. Sondyqtan mal bordaqylaıtyndar men malshylar ónimin syrtqa satýǵa talpynady. Osyndaı úlken eksport suranysy bolyp turǵandyqtan keshendi jospar bekittik. Sonyń arqasynda ishki qajettilikti ǵana qanaǵattandyryp qoımaı, eksporttaǵy áleýetimizdi de tolyqtaı ıgere alamyz, — dedi mınıstrdiń orynbasary.

Buǵan deıin Aýyl sharýashylyǵy mınıstri Aıdarbek Saparov ettiń ádiletti baǵasy neshe teńge bolý kerektigin aıtqan edi.