Mal sharýashylyǵyna arnalǵan jańa nesıe baǵdarlamasy iske qosylady
ASTANA. KAZINFORM — Aýyl sharýashylyǵy mınıstri Aıdarbek Saparovtyń tóraǵalyǵymen agroónerkásiptik keshende jeńildetilgen nesıeleý júıesin damytý máselelerine arnalǵan keńeıtilgen alqa otyrysy ótti, dep habarlaıdy vedomstvonyń baspasóz qyzmeti.
Іs-sharaǵa oblys ákimderiniń orynbasarlary, aýyl sharýashylyǵy basqarmalarynyń, vedomstvolyq uıymdardyń, aýmaqtyq bólimsheler men qarjy ınstıtýttarynyń basshylary — barlyǵy 200-den astam adam qatysty.
Aýyl sharýashylyǵy vıtse-mınıstri Erbol Tasjúrekov negizgi baǵyttar boıynsha jeńildetilgen qarjylandyrý kólemin ulǵaıtý sharalary týraly baıandady. Olardyń qatarynda kóktemgi egis jáne kúzgi jınaý jumystaryn júrgizý, aýyl sharýashylyǵy tehnıkasyn lızıngke berý, aýyl sharýashylyǵy ónimderin qaıta óńdeý bar.
Kóktemgi egis jáne kúzgi jınaý jumystaryn jeńildetilgen qarjylandyrý baǵdarlamasy aıasynda 7 230 aýyl sharýashylyǵy taýaryn óndirýshige 468,2 mlrd teńge bólindi. Bul 7,5 mln gektar egis alqabyn qamtydy.
«Damý» kásipkerlikti damytý qory» AQ-nyń kepildik berý baǵdarlamasy aıasynda jalpy somasy 212,8 mlrd teńgeni quraıtyn 1 226 kepildik berildi.
Aýyl sharýashylyǵy tehnıkasy parkin jańartý maqsatynda 2025 jyly «Jeńildetilgen lızıng» baǵdarlamasy aıasynda 250 mlrd teńge qarastyrylǵan. Bul keminde 6 myń birlik tehnıka satyp alýǵa múmkindik beredi. 24 aqpanda ótinim qabyldaý bastalǵaly 140,1 mlrd teńgege 3 640 ótinim tústi.
Qaıta óńdeý salasyn yntalandyrý maqsatynda qarjy ınstıtýttaryn sýbsıdııalaýdyń jańa mehanızmi engizildi. Bul qaıta óńdeýshi kásiporyndardyń aınalym qarajatyn tolyqtyrýǵa arnalǵan nesıelerdiń mólsherlemesin jyldyq 5%-ǵa deıin arzandatýǵa múmkindik beredi. Osy maqsatqa «Agrarlyq nesıe korporatsııasy» AQ arqyly 44 mlrd teńgeden astam qarajat baǵyttalmaq.
Mınıstrlik «Báıterek» ulttyq basqarýshy holdıngimen birlesip, eń aldymen bordaqylaý alańdaryn qarjylandyrýǵa baǵyttalǵan mal sharýashylyǵy sýbektilerine arnalǵan jańa jeńildetilgen nesıeleý baǵdarlamasyn iske qosýdy josparlap otyr.
Josparlanǵan qarjylandyrý kólemi — jyldyq 5% mólsherlememen 50 mlrd teńge. Nesıelerdiń qoljetimdiligin arttyrý úshin «Damý» kásipkerlikti damytý qory» AQ arqyly kepildendirý tetigi qoldanylmaq.
— Barlyq kúsh-jiger qoljetimdi qarjylandyrýdy qamtamasyz etýge, agrarlyq sektordyń ornyqty ósýine jáne tehnologııalyq jańarýyna baǵyttalýy tıis. Jeńildetilgen nesıeleý naqty nátıje berýi qajet — bul ónimdilik pen eksporttyq áleýetti arttyrý, — dep atap ótti mınıstr.
Alqa qorytyndysy boıynsha «Báıterek» holdıngi jáne «Agrarlyq nesıe korporatsııasy» AQ-men birlesip mal sharýashylyǵyn jeńildetilgen qarjylandyrýdy iske qosý, «Keń dala-2» baǵdarlamasyna jylyjaılar men jemis baqtaryn qarjylandyrý baǵytyn engizý, Soltústik Qazaqstan oblysynyń tájirıbesin keńinen taratý, qarjynyń maqsatty ári tıimdi paıdalanylýy men qaıtarymyn qamtamasyz etý boıynsha naqty tapsyrmalar berildi.
Buǵan deıin Aýyl sharýashylǵy mınıstri Aıdarbek Saparov mal sharýashylyǵyn damytýǵa kooperatıvter arqyly berilip kelgen sýbsıdııalar toqtaıtynyn aıtqan edi.