Mal sharýashylyǵyn júrgizbegen kásipkerlerden jer qaıtaryp alynady — Úkimet basshysy

ASTANA. KAZINFORM — Keıbir iri jer ıelenýshiler maýsymdyq kezeńde ǵana jumys istep, qalǵan ýaqytta aýylda jumyssyzdyq beleń alady. Bul týraly Memleket basshysy Qasym-Jomart Toqaevtyń tóraǵalyǵymen ótip jatqan Úkimettiń keńeıtilgen otyrysynda Premer-mınıstr Oljas Bektenov aıtty.

— Agroónerkásip kesheninde salanyń kórsetkishterine ǵana emes, sonymen qatar aýyldaǵy ómir sapasyna da áser etip otyrǵan birqatar sheshimin kútken máseleler bar. Kólemdi ınvestıtsııalar men úzdik agrotehnologııalar eginshilik salasynda ónimdilikti arttyrýǵa múmkindik berse, mal sharýashylyǵy bul jaǵynan edáýir artta qalyp qoıdy. Atalǵan salada ósim 2-3 paıyzdan aspaıdy. Bul árıne, ózin-ózi qamtamasyz etý, óńdeýdi damytý, eksport kólemin arttyrý sııaqty máselelerdi sheshýge múmkindik bermeıdi. Veterınarııa, mal sharýashylyǵyn ǵylymı jáne kadrlyq qamtamasyz etý baǵytynda da máseleler jetkilikti, — dedi Úkimet basshysy.

Onyń málimetinshe, keıbir iri jer ıelenýshiler maýsymdyq kezeńde ǵana jumys istep, qalǵan ýaqytta aýylda jumyssyzdyq beleń alady. Sondyqtan 10 myń gektardan astam jerdi paıdalanyp otyrǵan kásipkerlerge mindetti túrde mal sharýashylyǵyn júrgizý talaptary qoıyldy. Oryndamaǵan jaǵdaıda, tıisti sharalar qabyldanady, onyń ishinde jerdi qaıtaryp alý tetikteri de bar.

— Mal sharýashylyǵyn damytý boıynsha keshendi josparda asyl tuqymdy mal basyn satyp alýǵa jeńildetilgen nesıe berý, malshylardyń balalaryna bilim granttaryn usyný, jasandy uryqtandyrýdyń zamanaýı tehnologııalaryn engizý jáne jaıylymdyq mal sharýashylyǵyn damytý sharalary kózdelgen, — dedi Oljas Bektenov.

Buǵan deıin Premer-mınıstr óńdeý ónerkásibiniń qazirgi ósý qarqyny ekonomıkany tolyqqandy ártaraptandyrý úshin jetkiliksiz ekenin aıtqan edi.