Mal sharýashylyǵyn damytý keshendi jospary: nesıeler naýryz aıynda berile bastaıdy
ASTANA. KAZINFORM - Qazaqstan Malshylar Odaǵy Keshendi jospardy tolyq qoldaıtynyn jáne ony belsendi júzege asyrýǵa daıyn ekenin rastady.
QR Aýyl sharýashylyǵy mınıstrligi baspasóz qyzmetiniń habarlaýynsha, Astanada Qazaqstan Malshylar Odaǵynyń alǵashqy otyrysy ótip, oǵan Aýyl sharýashylyǵy vıtse-mınıstri Amanǵalı Berdalın qatysty.
Malshylar Odaǵynyń basshysy Daýren Salykov jańa salalyq birlestik qyzmetiniń negizgi baǵyttaryn jarııalady.
Otyrystyń basty nazarynda mal sharýashylyǵyn damytýdyń Keshendi josparyn talqylaý boldy. Vıtse-mınıstr qazirgi ýaqytta salany qarjylandyrý kózderi pysyqtalyp jatqanyn, al alǵashqy kredıtterdiń naýryz aıynda beriletinin habarlady.
«Qaıyp ata» JShS basshysy Syrym Ertaev Úkimet bekitken Keshendi jospar otandyq et óndirisin jańa sapalyq deńgeıge kóterýge múmkindik beretinin atap ótti.
- Memleket basshysy óziniń Joldaýynda mal sharýashylyǵyn damytý jumysyn kúsheıtý jóninde tapsyrma berdi. Osy maqsatqa jetý úshin bizde barlyq qajetti resýrstar men keń jaıylymdyq jerler bar, — dedi ol.
Sondaı-aq jospar týraly pikirin «Dorper» tuqymdy qoılar respýblıkalyq palatasynyń tóraǵasy Dýman Naǵashbekuly, qazaq aqbasty tuqymynyń respýblıkalyq palatasynyń dırektory Bahtııar Ótelbaev, «Elim-Aı Kókpekti» JShS dırektory Bolat Bekberdınov te bildirdi.
Qazaqstan Malshylar Odaǵy barlyq mal sharýashylyǵy salasynyń qatysýshylaryn úılestirý jáne múddelerin qorǵaý úshin qurylǵan. Onyń qurylýy kásibı qaýymdastyqtyń sala ishindegi júıeli ózara árekettesý jáne negizgi damý máseleleri boıynsha birlesken ustanym jasaý qajettiliginen týyndady.
Odaq quramyna respýblıkalyq salalyq palatalar, iri aýyl sharýashylyǵy taýar óndirýshileri, azyqtandyrý alańdary, surypty sharýashylyqtar, et óńdeý kásiporyndary, sondaı-aq óndiristik tizbek boıymen — ósirýden óńdeýge jáne ónimdi satýǵa deıin jumys isteıtin fermerlik sharýashylyqtar kirdi. Qazirgi ýaqytta Odaqqa 1800-den astam sharýashylyq qosylǵan.
Odaq qyzmetiniń basty baǵyttarynyń biri — shaǵyn jáne orta fermerlik sharýashylyqtardy qoldaý. Jańa alań sharýalardyń memlekettik qoldaý sharalaryna, qarjylandyrýǵa, salalyq saraptama men satý naryqtaryna qoljetimdilikti keńeıtedi, iri naryq qatysýshylarymen ózara árekettestikti jeńildetedi jáne kooperatsııany damytýǵa múmkindik beredi. Jalpy, birlestiktiń qyzmeti saladaǵy naqty máselelerdi sheshýge — ónimdilikti jáne sapany arttyrýǵa, óńdeýdi damytýǵa jáne eksporttyq áleýetti kúsheıtýge baǵyttalǵan.
Otyrystyń qorytyndysy boıynsha Malshylar Odaǵynyń keńes quramy bekitilip, birlestiktiń tóraǵasy saılandy. Daýys berý nátıjesinde tóraǵa qyzmetine Syrym Ertaev saılandy.
Osyǵan deıin kóshpeli mal sharýashylyǵyn damytýǵa arnalǵan biryńǵaı kredıttik ónim iske qosylatyny týraly jazdyq.