Mal sharýashylyǵy AÓK-tiń jalpy óniminiń 40%-yn qamtamasyz etip otyr
ASTANA. KAZINFORM — Prezıdent Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýy men Memleket basshysynyń ózge de tapsyrmalaryn oryndaý aıasynda elimizde mal sharýashylyǵyn damytýǵa baǵyttalǵan jańa tetikter engizilýde.
Mal sharýashylyǵy — eldiń azyq-túlik qaýipsizdigin qamtamasyz etetin strategııalyq mańyzdy sala. Ol agroónerkásip kesheniniń jalpy óniminiń shamamen 40%-yn quraıdy. 2025 jyldyń qańtar–shilde aılarynda óndiris kólemi 3,4%-ǵa ósip, 2 trln teńgege jýyqtady. Et óndirisi 2%-ǵa artyp, 608,8 myń tonnaǵa jetse, sút óndirý kólemi 6,5%-ǵa kóbeıip, 2,25 mln tonnany qurady.
Mal men qus sany da turaqty túrde ósýde: iri qara mal – 8,7 mln bas (+0,3%), jylqy – 4,6 mln (+6,7%), túıe – 300 myń (+3,9%), qus – 48 mln (+6,6%). Degenmen, qoı basy 3,7%-ǵa kemip, 21,1 mln basty qurady.
Eksport baǵytynda da oń nátıjeler bar. 2025 jyldyń alǵashqy bes aıynda sıyr eti eksporty 2,5 esege ósip, 12,3 myń tonnaǵa jetti. Qoı eti eksporty 2,6 esege artyp, 9,2 myń tonnany qurady. Alǵash ret 797 tonna shoshqa eti syrtqy naryqqa shyǵaryldy. Bul kórsetkishter qazaqstandyq ónimniń halyqaralyq deńgeıde suranysqa ıe ekenin dáleldeıdi.
«Etti iri qara mal sharýashylyǵynda nesıe taza 5%-ben beriledi. Qarjylandyrý kólemi – 50 mlrd teńge. Bıyl óńdeý kásiporyndarynyń aınalym qarajatyn jeńildetilgen nesıeleýge 44 mlrd teńge bólindi. Sondaı-aq fermerlerdiń kepilge qoljetimdiligi máselesin sheshý úshin nesıe somasynyń 85%-yna deıin kepildik berý baǵdarlamasy júzege asyrylýda», – dedi QR Aýyl sharýashylyǵy mınıstri Aıdarbek Saparov.
Osylaısha, Qazaqstandaǵy mal sharýashylyǵy turaqty damý qarqynyn kórsetýde: ishki óndiris kólemi artyp, eksporttyq áleýeti nyǵaıyp keledi, jańa qoldaý tetikteri iske asyrylýda jáne halyqaralyq deńgeıde klasterler qurylyp jatyr. Sala agroónerkásip kesheniniń basty ósim núkteleriniń birine aınalyp otyr.
Aıta keteıik, mal bordaqylaý alańdaryna 23,3 mlrd teńgege jeńildetilgen nesıege ótinim berildi.