Mal saýdasyndaǵy deldaldardy bırja arqyly joıamyz – Qasym-Jomart Toqaev

ASTANA. KAZINFORM – Memleket basshysy Qasym-Jomart Toqaev aýyl sharýashylyǵy qyzmetkerleriniń birinshi forýmynda mal saýdasynyń bırjasy ne úshin qurylyp jatqanyn aıtty.

«Byltyrǵy Joldaýda úsh jyldyń ishinde agroónerkásip keshenindegi qaıta óńdelgen ónimniń úlesin 70 paıyzǵa deıin arttyrý mindetin qoıdym. Biz negizgi azyq-túlik taýarlary boıynsha ımportqa táýeldilikti azaıtýǵa baǵyttalǵan birqatar jobany júzege asyra bastadyq. Atap aıtqanda, taıaý jyldary sút óndirý kólemin 600 myń tonnaǵa kóbeıtýge múmkindik beretin 116 zamanaýı taýarly sút fermasy salynady», - dedi Qasym-Jomart Toqaev.

Prezıdenttiń aıtýynsha, aldaǵy ýaqytta jylyna 220 myń tonna qus etin óndiretin 29 fabrıkany, jylyna 850 mıllıon jumyrtqa óndiretin 11 qus fabrıkasyn paıdalanýǵa berý kózdelgen.

«100 myńǵa jýyq iri qaraǵa arnalǵan 6 bordaqylaý alańyn, sondaı-aq 50 myń bas ýaq malǵa arnalǵan bordaqylaý keshenin iske qosý josparlanyp otyr. Sonymen qatar Úkimet alǵashqy mamandandyrylǵan bırja ashýdy qolǵa aldy. Bul keshende mal saýdasynyń zamanaýı erejeleri saqtalyp, fermerler men tutynýshylar arasynda basy artyq deldaldar bolmaıdy», - dedi Prezıdent.

Eske sala keteıik, Astanada aýyl sharýashylyǵy salasy qyzmetkerleriniń forýmy ótip jatyr.