Mal qorymdaryna bólingen qarjynyń qalaı jumsalǵany tekseriledi

NUR-SULTAN. QazAqparat – QR Sybaılas jemqorlyqqa qarsy kúres agenttigi eldegi mal qorymdaryn kútip ustaýǵa bólingen qarjynyń qanshalyqty oryndy ıgerilgenin tekseredi, dep habarlaıdy QazAqparat tilshisi.

Bul týraly QR Sybaılas jemqorlyqqa qarsy kúres agenttigi basshysynyń birinshi orynbasary Oljas Bektenov Aýyl sharýashylyǵy mınıstrliginiń ókilderimen ótken keńeste aıtty.

«Mal qorymdarynyń jaǵdaıy boıynsha úlken máseleler bar. Mysaly, Jezqazǵandaǵy bir qorymdy tekserý kezinde ǵana kóptegen zańbuzýshylyq anyqtaldy. Qaqpaqtar ashyq, mal men ań, bóten adamdar qorymǵa emin-erkin kirip júr. Bulaı bolmaýy kerek. Ol úshin memleket jyl saıyn aqsha bólip otyr. Bul jerde eki másele bolýy múmkin. Álde aqsha tolyq bólinbeıdi, álde bólingen aqsha qorymǵa jetpeı, qoldy bolady degen sóz», - degen Oljas Bektenov óńirlerdegi agenttik departamentterine osy másele boıynsha jan-jaqty tekserý júrgizý týraly tapsyrma berdi.

«Sybaılas jemqorlyqqa qarsy kúres agenttiginiń aýmaqtyq departamentterine qoǵamdyq qaýymdastyq ókilderimen sóılese otyryp, óńir-óńirdegi mal qorymdaryna bólingen qarjynyń jaǵdaıyn tekserý júrgizýdi tapsyramyn. Jetkilikti bóline me, jetkilikti bólinse, tıimdi ıegirilip jatyr ma, dittegen jerge jetpeı qalyp jatqan joq pa? Osy saýaldarǵa jaýap izdeý kerek», - dedi agenttik ókili.

Oljas Bektenov keńes barysynda Jambyl, Mańǵystaý oblystary men Almaty qalasynda aýyl sharýashylyq ónimderdiń jabaıy saýdasy tyıylmaı turǵanyn synǵa aldy. Bul istiń turǵyndar densaýlyǵyna tikeleı qatysty ekenin eske salǵan agenttik ókili óńirlerde ótkiziletin jármeńkelerdiń de talapqa saı uıymdastyrylýyna kóńil bólý qajettigin atady.