Mal qystaıtyn oryndar men aýyl turǵyndaryna jem-shóp ýaqytyly jetý kerek - AShM
Aýyl sharýashylyǵy vıtse-mınıstri Amanǵalı Berdalın tóraǵalyq etken jedel shtab otyrysynda maldyń qystyq azyǵyn daıyndaý máselesi talqylandy, dep habarlaıdy Kazinform.
Mal sharýashylyǵy departamenti dırektorynyń mindetin atqarýshy Baǵlan Aımurzaevtyń aıtýynsha, aldaǵy qysqa 24,6 mln tonna pishen, 1,4 mln tonna pishendeme, 1,8 mln tonna súrlem, 4,2 mln tonna saban jáne 4,5 mln tonna quramajem daıyndaldy. Ótken jyly jınalǵan qordy qosa eseptegende jem-shóptiń barlyq túri boıynsha daıyndalǵan mal azyǵynyń jalpy kólemi 39,9 mln tonna.
Pavlodar oblysyndaǵy klımattyq jaǵdaıǵa baılanysty qýańshylyqtyń saldarynan sharýalar shabyndyqqa der kezinde shyǵa almady. Sondyqtan fermerlerge ormandy alqaptaǵy jáne basqa da qorlardan shabyndyq jer berip, qosymsha dızel otynyn bólý arqyly qoldaý kórsetildi. Osynyń nátıjesinde oblysta 1,5 mln tonna shóp daıyndaldy.
Al Batys Qazaqstan oblysynda shóp daıyndaý qarqyny respýblıkalyq deńgeıden tómen. Sondaı-aq Batys Qazaqstan, Túrkistan, Shyǵys Qazaqstan oblystarynda qunarlanǵan azyq daıyndaýdyń qarqyny tómen ekeni baıqalady.
Amanǵalı Berdalın 2023 jyldyń 1-qyrkúıeginen bastap 2023 jyldyń 31-jeltoqsanyna deıin «Qazaqstan Temir Joly» ulttyq kompanııasy Mańǵystaý oblysynyń fermerlerine jem-shóp tasymaldaý tarıfteriniń deńgeıin 80%-ǵa tómendetkenin atap ótti. Biraq mal azyǵyn daıyndaý qarqyny ázirge qajetti deńgeıge jetken joq.
Otyrysta aıtylǵan máselelerdi eskere otyryp, vıtse-mınıstr Mańǵystaý oblysynyń ákimdigine «Qazaqstan Temir Joly» ulttyq kompanııasy usynyp otyrǵan jeńildetilgen tarıfterdi barynsha qoldanýdy, josparlanǵan mal azyǵyn jetkizýdi tapsyrdy. Aqtóbe, Batys Qazaqstan, Shyǵys Qazaqstan, Jambyl jáne Túrkistan oblystarynyń ákimdikterine jem-shóp daıyndaý barysyn qatań baqylaýǵa alýdy mindettedi.
Budan bólek vıtse-mınıstr barlyq oblys ákimdikterine daıyndalǵan jem-shópti mal qystaıtyn oryndarǵa jáne mal ustap otyrǵan aýyl turǵyndaryna ýaqytyly jetkizý úshin tıisti sharalar qabyldaýdy tapsyrdy.
