Mal qyrylyp jatyr: Qyzylorda oblystyq veterınarııa basqarmasy jaýap berdi
QYZYLORDA. KAZINFORM — Qyzylorda oblysynda «Jalaǵash aýdanynda belgisiz indetten mal jappaı qyrylyp jatyr» degen aqparat tarady.
Beınekórsetilimde turǵyndar iri qaralarynyń aýyzynan aq kóbik aǵyp, tiliniń terisi sypyrylǵanyn, álsirep, tipti tórt aıaqqa tura almaı qalǵanyn aıtqan. Alaıda, oblystyq veterınarııa basqarmasy muny jalǵan aqparat dep joqqa shyǵardy.
Basqarmanyń málimetine súıensek, aýdandyq aýmaqtyq ınspektsııa, veterınarııa stantsııasy mamandarynan qurylǵan arnaıy top mal ıelerine tıesili aýmaqqa baryp, jaǵdaıǵa qanyqty. Aýyl sharýashylyǵy janýarlarynyń derekqor bazasynda Jalaǵash kentiniń turǵyndary F.Bısenovanyń 8, Q.Joldybaevtyń 7 bas múıizdi iri qarasy tirkelgen. Barlyǵy asa qaýipti aýrýlarǵa qarsy aldyn ala egilgen.
— «Jappaı mal qyrylyp jatyr» degen aqparat jalǵan. Biz turǵyndardyń úıine baryp, iri qaralardan qan synamasyn alyp, laboratorııaǵa joldadyq. Olardyń aıtqany aýa raıynyń kúrt sýýynan kúıi tómen malda kezdesetin jaǵdaıǵa uqsaıdy. Jem-shópten nemese sýdan ýlandy ma, qan synamasy arqyly sony da anyqtaımyz. Shyn máninde mal basy túgel, eshqandaı aýrý belgileri baıqalmady, — dedi basqarma basshysy Shahmardan Qoıshybaev.
Bıosynamalar men qan sarysýy arqyly kúldirik stomatıt, vırýstyq dıareıa, ınfektsııalyq rınotraheıt, aýsyldyń qurylymsyz aqýyzy aýrýlarynyń bar-joǵy anyqtalady. Onyń qorytyndysy 7-10 kún shamasynda belgili bolmaq.
— Bul aýrýlardyń klınıkalyq beligileri bir-birine uqsas. Veterınar mamandar shuǵyl áreket jasap, mal ıeleriniń qora-jaılaryn zalalsyzdandyrdy, — dedi Shahmardan Qoıshybaev.
Buǵan deıin biz Qazaqstanda mal aýrýy 51%-ǵa tómendegeni týraly jazǵan bolatynbyz.