Mal izdep júrip adasyp ketken Aqmola turǵyny ormanda túnep shyqty

KÓKShETAÝ. QazAqparat – Aqmola oblysynyń Zerendi aýdanynda joǵalǵan er adam kelesi kúni orman ishinen tabyldy, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, 5 sáýir kúni keshki saǵat 21:20 Zerendi aýdandyq polıtsııa bóliminiń «102» jelisine 60 jastaǵy jergilikti turǵyn telefon shalyp, kómek surady.

Er adam úıinen jylqy izdeýge shyǵyp, ormanda adasyp qalǵanyn aıtqan.

«Joǵalǵan adamdy izdeýge Zerendi aýdandyq polıtsııa bóliminiń jeke quramy jáne eriktilerden quralǵan 50-den astam adam tartyldy. Іzdestirý jumystary túni boıy jalǵasty. Telefony jeli aımaǵynan tys jerde bolǵandyqtan, onymen baılanysý múmkin bolmady. Er adam tek kelesi kúni, 6 sáýirde saǵat 11:00 shamasynda Zerendi aýylynan 5 shaqyrym radıýstaǵy orman alqabynan tabyldy», - dedi vedomstvodan.

PD baspasóz qyzmetinen atap ótkendeı, er adam túnde orman ishinde ot jaǵyp jylynǵan.

Qazirgi kezde onyń ómiri men densaýlyǵyna qaýip tónip turǵan joq.