Maldıv araldary basshysynyń kemesinde bolǵan jarylys qastandyq ekeni anyqtaldy
ASTANA. QazAqparat - Qyrkúıek aıynyń sońynda Maldıv araldary prezıdenti Abdýlla ıAmınniń kemesinde bolǵan jarylys ony óltirý úshin arnaıy uıymdastyrylǵan qastandyq ekeni anyqtaldy, dep habarlady Maldıv araldary mınıstri Hýsseın Sharıf. Bul týraly «RIA Novostı» agenttigi habarlady.
«Reıter» agenttiginiń habarlaýynsha, oqıǵaǵa baılanysty júrgizilgen halyqaralyq tekseris nátıjesinde eki áskerı qyzmetker ustaldy.
Eske sala keteıik, Prezıdent Abdýlla ıAmınniń kemesinde jarylys 28 qyrkúıek kúni el astanasy Male qalasyna jete bergende bolǵan. Abdýlla ıAmın Maldıv araldaryna Saýd Arabııasynynan qajylyq paryzyn ótep kele jatqan. Jarylystan ıAmınniń áıeli men kómekshisi jeńil jaralandy.
