Mal bordaqylaý alańdaryna 23,3 mlrd teńgege jeńildetilgen nesıege ótinim berildi

ASTANA. KAZINFORM –  QR Aýyl sharýashylyǵy mınıstrligi «Agrarlyq nesıe korporatsııasy» AQ-men birlesip, QR Úkimetiniń qoldaýymen bordaqylaý alańdaryn jeńildetilgen nesıeleý baǵdarlamasyn iske asyrýdy jalǵastyryp jatyr.

Búgingi kúni baǵdarlama aıasynda jalpy somasy 23,3 mlrd teńgege 45 ótinim qabyldandy. Onyń ishinde 22,3 mlrd teńge bolatyn 42 ótinim iri qara maldy bordaqylaý baǵytynda, al 950 mln teńgege 3 ótinim usaq maldy bordaqylaý baǵytynda tústi.

Aýyl sharýashylyǵy mınıstrligi málimetinshe, eń belsendilik tanytyp otyrǵan óńirler – Batys Qazaqstan, Túrkistan, Aqtóbe oblystary jáne basqa da birqatar aımaqtar.

Eske sala ketsek, baǵdarlama 2025 jyldyń tamyz aıynyń basynda bastalǵan bolatyn. Jalpy qarjylandyrý kólemi shamamen 50 mlrd teńge.

Negizgi maqsat – aınalym qarajatyn tolyqtyrýǵa qoljetimdi nesıe berý arqyly iri qara men usaq maldy bordaqylaýmen aınalysatyn kásiporyndardy qoldaý. Nesıeleýdiń negizgi sharttary: qaryz merzimi – 12 aıǵa deıin, syıaqy mólsherlemesi – jyldyq 5%. Maqsatty aýdıtorııa – negizgi qyzmeti iri qara jáne/nemese usaq mal bordaqylaý bolyp tabylatyn jáne qajetti óndiristik ınfraqurylymy bar kásiporyndar.

Qatysýdyń mindetti sharty – bordaqylanǵan maldyń keminde 50%-yn otandyq et óńdeý kásiporyndaryna ótkizý. Ótinim berý nemese keńes alý úshin «Agrarlyq nesıe korporatsııasy» AQ-nyń jaqyn jerdegi aımaqtyq fılıalyna júginý qajet.

Mal bordaqylaý alańyna sýbsıdııa alý talaby jeńildeıtinin jazǵan edik.