Mal basy men egin shyǵymy týraly statıstıka «nólden» bastap júrgiziledi

ASTANA. KAZINFORM – Strategııalyq josparlaý jáne reformalar agenttigi Kazinform saýalyna joldaǵan jaýabynda aýyl sharýashylyǵyndaǵy mal basy men egin shyǵymy týraly resmı statıstıkanyń sapasyz ekenin moıyndady.

«Aǵymdaǵy statıstıka men naqty jaǵdaı arasyndaǵy sáıkessizdikten kórinetin belgili bir problemalar bar. Atap aıtqanda, resmı statıstıkalyq aqparatty qurastyrý úshin ákimshilik derekter qoldanylatyn salalarda sáıkessizdikter baıqalady. Qazirgi ýaqytta, ókinishke qaraı, vedomstvolardyń ákimshilik derekteriniń sapasyzdyǵy jıi kezdesedi. Mysaly, elektrondy sharýashylyq esebiniń derekteri men baqylaý júrisi arasyndaǵy eleýli sáıkessizdikter aýyl sharýashylyǵy statıstıkasyndaǵy ákimshilik derekterdiń sapasynyń tómendigin kórsetedi» dep jazylǵan jaýapta.

Osy olqylyqtyń ornyn toltyrý úshin Úkimet ákimdikterge tıisti derekterdi nólden bastap qalyptastyrýdy tapsyrǵan. 

«Aýyl sharýashylyǵy salasyndaǵy naqty jaǵdaıdy anyqtaý úshin Úkimet oblys ákimdikterine 2024 jylǵy 1 qańtardaǵy jaǵdaı boıynsha aýyl sharýashylyǵy janýarlary men qustardyń sanyn jáne 2024 jylǵy 1 shildedegi jaǵdaı boıynsha egis alqaby jáne aýyl sharýashylyǵy daqyldarynyń jalpy túsimi týraly derekterin «nólden» naqtylaýdy tapsyrdy. Derekterdi naqtylaýdyń oryndalý sapasyn baǵalaý úshin quramyna jergilikti atqarýshy organdar, aýyl sharýashylyǵy jáne veterınarııalyq qyzmet basqarmasynyń ókilderi kirgen derbes jumys toptary quryldy» delingen mınıstrlik jaýabynda.