Mal azyǵynyń tapshylyǵyna jol bermeýimiz kerek – Premer-Mınıstr
NUR-SULTAN. QazAqparat – Aýyl sharýashylyǵy óndirýshilerine sýbsıdııa berý jumystaryn jarııalap otyrý qajet. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.
«Qazirgi boljam boıynsha keıbir óńirlerde jaýyn-shashyn az bolýy múmkin. Sondyqtan da qajetti sheshimder qabyldandy. Sýmen qamtamasyz etý máselesin erekshe baqylaýda ustaý qajet. Biz byltyrǵydaı mal azyǵynyń tapshylyǵyna jol bermeýimiz kerek. Bıyl ákimdikterge jem-shóp egis alqaptaryn ulǵaıtýdy tapsyramyn», - dedi Á. Smaıylov.
Úkimet basshysynyń aıtýynsha, egis jumystarynyń barysy, áleýmettik mańyzy bar azyq-túlik ónimderiniń jetkilikti qory týraly Aýyl sharýashylyǵy mınıstrligi men ákimdikter halyqty keńinen habardar etý kerek.
«Aýyl sharýashylyǵy óndirýshilerine sýbsıdııa berý jumystaryn da jarııalap otyrý qajet», - dedi Premer-Mınıstr.
Budan buryn habarlanǵandaı, Álıhan Smaıylov qabyldanǵan sharalar elimizde baǵanyń ósýin tejeýge oń yqpal etýi tıis ekenin aıtty.
Úkimet basshysy Abaı, Ulytaý, Jetisý oblystarynyń qurylýy jergilikti turǵyndardyń problemalaryn jedel sheshýge múmkindik beretinin atap ótti.
