Mal azyǵy az, egis alqaby nashar jaǵdaıda: ShQO sharýalary qýańshylyqtyń zardabyn tartyp otyr

ÓSKEMEN. QazAqparat – Bıyl elimizdegi birneshe óńir sharýalaryn qýańshylyq qysyp tur. Onyń ishinde Shyǵys Qazaqstanda jaz boıy jańbyr az jaýyp, sharýa qojalyq ıeleri maldyń qysqy azyǵyn daıyndaı almaı jatyr, dep habarlaıdy QazAqparat tilshisi.

Ulan aýdanynyń turǵyny Qozybek Qamzın oblysta shóp az óskendikten deldaldar mal azyǵyn basqa óńirlerden ákelip satyp jatqanyn aıtty. Olar janarmaı men basqa da shyǵyndardy qosqandyqtan jem-shóptiń quny aıtarlyqtaı qymbattap ketken.

- Tabysymyzdy mal baǵyp taýyp otyrǵannan keıin amalsyzdan satyp alýǵa týra keledi. Shóptiń 18 kelideı salmaǵy bar bir túgin 16 myń teńgeden satyp aldyq. Endi bul baǵa taǵy kóteriledi dep jatyr, - deıdi sharýager.

Óskemen irgesinde sharýa qojalyǵy bar Muhamet Talǵatbek te shóp baǵasynyń qymbattap ketkendigi qaltaǵa salmaq bolyp otyrǵanyn jetkizdi.

- Mal sharýashylyǵy ata-babamyzdan qalǵan kásip. Ony ary qaraı damytýymyz kerek. Eger jem-shóp qymbattasa ol tórt túlik ónimderi baǵasynyń ósýine de ákelip soǵýy múmkin, - deıdi sharýager.

Osy rette, ShQO Aýyl sharýashylyǵy basqarmasy basshysynyń orynbasary Dılıara Jylqaıdarovaǵa habarlasyp kórdik. Onyń aıtýynsha, tamyz aıyndaǵy statıstıka boıynsha oblysta 519 386 iri qara, 740 224 usaq mal, 226 965 jylqy, 48 476 shoshqa bar.

Shoshqadan basqa tórt túlik túrleriniń sanynda ótken jylmen salystyrǵanda azǵantaı ósim baıqalýda. Jalpy mal baǵyp otyrǵan oblys sharýalaryna 840 myń tonna jem-shóp qajet. Qazirgi ýaqytta onyń 35 paıyzy daıyndalǵan. Eger mal azyǵy jetkiliksiz bolsa basqarma aýdan ákimdikterimen birlesip, orman sharýashylyqtaryndaǵy jáne paıdalanylmaı jatqan jerlerdi sharýalar men aýyl turǵyndaryna shóp shaýyp alýǵa beredi.

Qýańshylyq Shyǵys Qazaqstandaǵy egis alqaptaryna da zardabyn tıgizýde. Bıyl aımaqta aýyl sharýashylyǵy egis kólemi 639,8 myń gektardy quraǵan. Bul ótken jylmen salystyrǵanda 2,6 myń gektarǵa az.

- Oblys boıynsha dándi jáne burshaq daqyldary 290,2 myń gektarǵa egilgen. Onyń ishinde 197,2 myń gektar (68%) jaqsy jaǵdaıda, 65,5 myń gektar (22,5%) qanaǵattanarlyq jaǵdaıda, 27,5 myń gektar (9,5%) nashar jaǵdaıda. Maıly daqyldardyń egis kólemi – 210,9 myń gektar. Onyń ishinde 160,6 myń gektar (76%) jaqsy jaǵdaıda, 44,6 myń gektar (21%) qanaǵattanarlyq jaǵdaıda, 5,7 myń gektar (3%) nashar jaǵdaıda. Al júgeri 2,8 myń gektarǵa egildi. Onyń ishinde 1,45 myń gektar (51,2%) jaqsy jaǵdaıda, 1,35 myń gektar (48,8%) qanaǵattanarlyq jaǵdaıda. Dıqandarǵa egin jınaýǵa 8,5 myń tonna dızel otyny arzandatylǵan baǵada satylady. Keste boıynsha dızel otyny shildede – 1,58 myń tonna, tamyzda – 3,378 myń tonna, qyrkúıek aıynda – 3,568 myń tonnaǵa bólindi. Búginde shilde aıyna bólingen dızeldik otyn tolyqtaı ıgerilgen, - deıdi Dılıara Jylqaıdarova.

Aıta keteıik, óńirde arzandatylǵan dızel otynynyń ortasha baǵasy – 1 lıtrine 245 teńgeni quraıdy.

Eske salsaq, osyǵan deıin Jambyl, Shyǵys Qazaqstan, Qostanaı jáne Pavlodar oblystarynda dándi daqyldar egis alqaptarynyń nashar jaǵdaıy qalyptasqany habarlanǵan.