Mal azyǵyn daıyndaý jospary artyǵymen oryndaldy

Negizgi tórt túrli mal azyǵyn daıyndaý boıynsha josparly kórsetkishter artyǵymen oryndaldy. Bul aldaǵy qysqy mal qystatý kezeńinde mal sharýashylyǵy qurylymdaryn qajetti jemshóppen qamtamasyz etýge berik negiz qalaıdy.

Atap aıtqanda, sharýalar 27 mln tonna shóp daıyndady. Bul jospardyń 105,2 paıyzyn quraıdy. Sonymen qatar 2,4 mln tonna pishendeme (jospardyń 103,9%-y), 2,9 mln tonna súrlem (105,3%), 4,9 mln tonna saban (103,5%) jáne 5,7 mln tonna qunarly jem (100,3%) ázirlendi.

Shóp, pishendeme, súrlem jáne saban daıyndaý boıynsha jospardyń artyǵymen oryndalýy qosymsha jemshóp qoryn qalyptastyrýǵa jáne mal sharýashylyǵy qojalyqtarynyń qystan shyǵýǵa daıyndyǵyn arttyrýǵa múmkindik beredi. Ásirese, aýa raıy qolaısyz bolǵan jaǵdaıda aýyl sharýashylyǵy taýaryn óndirýshilerdiń turaqty jumysyn qamtamasyz etýge septigin tıgizetin saqtyq qorlarynyń mańyzy zor.

Buǵan qosa, ótken qystaýdan qalǵan 3,6 mln tonna jemshóp te qosymsha resýrs retinde paıdalanylmaq.

Sondaı-aq aýyl sharýashylyǵy taýaryn óndirýshilerdi jemdik astyqpen qosymsha qamtamasyz etý maqsatynda «Azyq-túlik kelisimshart korporatsııasy» aktsıonerlik qoǵamy 200 myń tonna kóleminde jemdik astyq qoryn ázirledi. Qajet bolǵan jaǵdaıda bul astyq mal jáne qus sharýashylyǵynyń qajettiligine, onyń ishinde maýsymaralyq kezeńdegi suranysty óteýge baǵyttalady.

Aýyl sharýashylyǵy mınıstrligi óńir ákimdikterimen birlesip, mal azyǵyn daıyndaý naýqanynyń qorytyndy kezeńine monıtorıng júrgizýdi jalǵastyrýda. Ásirese, jetkilikti jemshóp qoryn qalyptastyrýǵa, daıyndaý jumystaryn ýaqytyly aıaqtaýǵa jáne sharýashylyqtardyń aldaǵy qystaýǵa daıyndyǵyna basa nazar aýdarylyp otyr.

Mol jemshóp qoryn qalyptastyrý — mal sharýashylyǵyn turaqty damytýdyń, mal basyn saqtaýdyń jáne mal sharýashylyǵy ónimderin turaqty óndirýdiń negizgi sharttarynyń biri. 

Aıta ketelik Ortalyq Azııaǵa 6,2 mln tonna qazaqstandyq astyq jetkizilgen edi.