Maqulyq pen mylqaý áıel mahabbaty týraly fılm Oskar-2018 jeńimpazy atandy

Saltanatty keshte maqulyq pen mylqaý áıel mahabbatyn baıandaıtyn «Sý pishin» (aǵylsh. The Shape of Water) fentezı-melodramasy «Úzdik fılm» atandy.
Gılermo del Toronyń bul týyndysy ótken ǵasyrdyń 60-jyldaryn sıpattaıdy. Baltımordaǵy qupııa áskerı zerthanaǵa jańa zertteý «nysany» - gýmanoıd-amfıbııa jetkizildi. Zerthanadaǵy mylqaý eden jýýshy Elaıza men maqulyq arasynda sezim ushqyny paıda bolady jáne Elaıza súıiktisin adamdar qursaýynan qutqarýǵa bel baılaıdy.
Atalǵan fılm bedeldi baıqaýdyń 13 atalymyna usynylyp, nomınatsııa sany boıynsha kósh bastaǵan bolatyn. Nátıjesinde, fılm «Úzdik fılm», «Úzdik rejısserlik jumys», «Fılmge arnalǵan úzdik mýzyka», «Úzdik kórkemdik qoıýshy» atalymdary boıynsha úzdik dep tanyldy.

Úzdik áıel jáne er adam rólderi boıynsha, buǵan deıin jazǵan boljamymyz dál keldi.  

«Úzdik er adam róli» álemdik deńgeıdegi saıasatker Ýınston Cherchıll beınesin sátti somdap shyqqan («Aýyr kezeń») Garı Oldmanǵa berilse, «Úzdik áıel róli» - jasóspirim qyzy aıaýsyz óltirilgen, ashynǵan ana Mıldredti oınaǵan («Mıssýrı, Ebbıng shekarasyndaǵy úsh bılbord») aktrısa Frensıs MakDormandqa berildi.   Qalyń kópshilikke «GarrıPotterdiń» ókil ákesi Sırıýs Blek bolyp tanylǵan Garı Oldman búgin alǵashqy Oskaryn ıelendi. Al Frensıs MakDormand 1997 jyly «Fargo» fılmindegi basty róli úshin Oskar syılyǵyn alǵan bolatyn.

«Ekinshi plandaǵy úzdik akter róli» úshin Oskar júldesi de «Mıssýrı, Ebbıng shekarasyndaǵy úsh bılbord» fılmindegi sherıf Bıll Ýılloýbıdi oınaǵan Výdı Harrelson jeńip aldy. Buǵan deıin 56 jastaǵy amerıkalyq akter «Oskar» syılyǵyna eki ret, «Altyn globýs» syılyǵyna - tórt ret úmitker atanyp, sátsizdikke ushyraǵan edi. Búgin, mine, kópten kútken kútken músinshesine qol jetkizdi.

«Ekinshi plandaǵy úzdik aktrısa róli» júldesi «Men, Tonıa» fılmindegi Tonıanyń anasy - Ellıson Djennıge berildi.  «Men, Tonıa» - AQSh-taǵy atyshýly mánerlep syrǵanaýshy Tonıa Hardıngtiń ómiri jaıly baıandaıdy. Tonıanyń anasy Lavona Feı Goldendi somdaǵan 58 jastaǵy aktrısa E. Djennı óz mansabynda kóptegen kınojúldelerge qol jetkizgen. Biraq, búgin alǵash ret bedeldi Oskar syılyǵyna ıe bolyp otyr.

«Shetel tilindegi úzdik fılm» atalymy boıynsha chılılik rejısseri Sebıastıan Lılıonyń «Fantastıka áıel» dramasy jeńimpaz atandy. Fılmdegi basty keıipker transseksýal Marına bir kezderi áıel bolyp ómir súrý úshin kúresken bolatyn. Endi súıiktisin jerleý rásimine qatysý úshin onyń birinshi otbasymen kúresýge májbúr. Marınanyń óz qalaýymen ómir súrýi, tutas qoǵamǵa qasqaıyp qarsy turýy, taptaýryn stereotıptermen jalǵyz kúresýi kórermenderge oı salarlyq.

«Úzdik túpnusqa stsenarıı»  - amerıkalyq rejısser Djordan Pıldyń horror, detektıv janryndaǵy «Aýlaq» fılmi qol jetkizgen jalǵyz júlde bolyp otyr.  «Úzdik beıimdelgen stsenarıı» - amerıkalyq jazýshy Andre Asımannyń «Meni óz atyńmen shaqyr» romany boıynsha túsirilgen melodramasyna berildi. Munda da  avtor 17 jastaǵy Elıo men 24 jastaǵy Olıverdiń ǵashyqtyq sezimin kórsetip, mahabbattan bas tartpaýǵa, qoǵamdaǵy eskishildikke, soqyr stereotıpterge qarsy turýǵa shaqyrady.

«Úzdik operator jumysy»  jáne «Úzdik vızýaldy áser» nomınatsııalarynda - «Júzben júgirýshi 2049» fantastıkalyq fılmi jeńimpaz atandy.

Tanymal tiginshi týraly «Kórinbeıtin jip» dramasy «Úzdik kostıým dızaıneri» atalymynda úzdik dep tanylsa, Ýınston Cherchılldi aınytpaı kórsete alǵan «Aýyr kezeń» fılminiń túsirilim toby - «Úzdik grım men shash úlgileri» atalymynda jeńiske jetti.

«Úzdik anımatsııalyq fılm» nomınatsııasynda mýzykant bolýdy armandaıtyn 12 jasar Mıgel týraly «Kokonyń qupııasy» «Boss-molokosos», «Ferdınant» syndy qarsylastaryn basyp ozdy. Sondaı-aq, mýltfılmdegi «Remember me» áni Oskardyń «Úzdik án» nomınatsııasynda da top jardy. «Úzdik qysqametrajdy anımatsııalyq fılm» atalymynda  «Qymbatty basketbol» týyndysy jeńimpaz atandy.
«Úzdik derekti fılm» júldesin áýesqoı velojarysta dopıng kómegimen jeńiske jetkisi kelgen Fogel týraly «Ikar» derekti fılmi jeńip alsa, «Úzdik qysqametrajdy derekti fılm» júldesin - «Jumaq - 405 shossedegi keptelis»,  «Úzdik qysqametrajdy fılm» júldesin - «Mylqaý bala»  týyndylary ıelendi.

Tanymal rejısser Krıstofer Nolan túsirgen «Dıýnkerk» áskerı dramasy Oskardyń 8 atalymyna úmitker bolǵan edi. Baıqaý nátıjesinde bul týyndy «Úzdik montaj»,  «Úzdik dybys montajy» jáne «Úzdik dybys úılesimi» atalymdarynda jeńiske jetti.

Aıta keteıik, Oskar-2018 marapattaý keshi Phenchhan qalasyndaǵy Olımpıada oıyndaryna baılanysty naýryz aıyna aýystyrylǵan bolatyn.

Eń alǵashqy marapattan bastap búgingi kúnge deıin 3 097 «Oskar» músinshesi tabystalǵan. Onyń bıiktigi 34 sm, salmaǵy 3,85 kg.

Foto: newsboxx.ru