Maqtaı Ramazanuly Saǵdıev halqymyzdyń shynaıy qurmeti men súıispenshiligine bólendi - Memleket basshysy

Budan buryn habarlanǵandaı, Memleket basshysy Nursultan Nazarbaev kórnekti memleket jáne qoǵam qaıratkeri Maqtaı Saǵdıevtiń dúnıeden ozýyna baılanysty marqumnyń otbasy men týǵan-týystaryna kóńil aıtý jedelhatyn joldady.

QR Prezıdenti baspasóz qyzmetiniń aqparatynda atap ótilgendeı, Prezıdenttiń jedelhatynda Maqtaı Ramazanuly uzaq ta ǵıbratty ǵumyr keshkeni aıtylǵan. Ol ártúrli joǵary laýazymdy qyzmetterdi zor abyroımen atqaryp, óziniń bar bilimi men uıymdastyrýshylyq darynyn týǵan eliniń ıgiligine jumsady.

- Qaı qyzmette de ózin qarapaıym, jan-júregi adal ári istiń kózin biletin bedeldi tulǵa retinde tanytyp, halqymyzdyń shynaıy qurmeti men súıispenshiligine bólendi. Ol kisiniń eńbegi men jarqyn dıdaryn halqymyz umytpaıdy, - delingen jedelhatta.

Soltústik Qazaqstan oblysy Lenın aýdanynyń Óndiris aýylynda dúnıege kelgen Maqtaı Saǵdıev eńbek jolyn 14 jasynda týǵan ujymsharynyń traktor-egis brıgadasynda bastady. 1950 jyly Semeı muǵalimder ınstıtýtynyń túlegi Qaraaǵash mektebine tarıh pániniń muǵalimi qyzmetine jiberiledi jáne kóp uzamaı onyń dırektory bolyp taǵaıyndalady. Budan keıin - armııadaǵy qyzmet, sodan keıin ıAvlenka jáne Ilınka aýyldarynda partııa jumystaryna aralasady.

Ilıch atyndaǵy MTS partbıýro hatshysy Saǵdıev óndiristen qol úzbeı Talǵar aýyl sharýashylyǵy tehnıkýmyn «agronom» mamandyǵy boıynsha aıaqtaıdy, al sodan keıin Joǵary partııa mektebin bitiredi. 1962 jyly ol  arta qalǵan «Afanasevskıı» keńsharynyń dırektory bolyp taǵaıyndalady jáne 2  jyldan keıin ony ozattar qataryna shyǵarady.

Tórt jyldan keıin Maqtaı Saǵdıevti Sokolov aýdandyq partııa komıtetiniń birinshi hatshysy etip saılady. Osy qyzmette onyń uıymdastyrýshylyq talantynyń jańa qyrlary ashyldy -  aýdan qysqa merzimde iri aýyl sharýashylyǵy óndirýshileriniń birine aınaldy, onyń sharýashylyqtarynyń ekonomıkasy nyǵaıa tústi, turǵyn úı, jol, óndiristik nysandar qurylysy óris aldy.

Kóp keshikpeı Saǵdıev jańadan ashylǵan Jambyl aýdanyna basshylyqqa jiberildi, al taǵy birqatar ýaqyttan keıin - Torǵaı oblystyq atqarý komıteti tóraǵasynyń birinshi orynbasary boldy.

Ol óziniń kúndelikti eńbegimen jáne qajyr-qaıratymen kúrdeli tabıǵı-klımattyq jaǵdaıdaǵy osy aımaqta aýyl sharýashylyǵy óndirisin eleýli túrde  kóterýge, onyń materıaldyq-tehnıkalyq bazasyn nyǵaıtýǵa, eldi mekenderdi abattandyrýǵa jáne elektrlendirýge, avtomobıl joldary men baılanys quraldary jelisiniń keńeıýine kúsh saldy. Halyq aǵartý, densaýlyq saqtaý jáne mádenıet isterinde eleýli ilgerileýshilikke qol jetkizildi.

Oblys ortalyǵy - Arqalyq qalasynda pedagogıkalyq ınstıtýt jáne birneshe tehnıkým, Mádenıet úıi jáne drama teatry, ólketaný murajaıy ashyldy, zamanaýı aýrýhana keshenderi salyndy, aýyl sharýashylyǵy ónimderin óńdeıtin jáne tehnıka jóndeıtin kásiporyndar paıda boldy.

1980 jyly Qazaqstan basshylyǵy ony Qazaq KSR balyq sharýashylyǵy mınıstri qyzmetine joǵarylatty. Ol mańyzdy saladaǵy istiń jaǵdaıy men problemalaryna tez arada qanyqty. Buǵan onyń sharýashylyq qyzmetindegi jáne uıymdastyrý jumystaryndaǵy burynǵy jınaǵan tájirıbesi jaqsy kómektesti. Halyqqa ishki sý qoımalaryndaǵy balyq ónimderimen qatar, teńiz balyǵy jáne balyq ónimderi qoljetimdi boldy. Respýblıka astanasynda jáne oblys ortalyqtarynda zamanaýı saýda-tehnologııalyq jáne tońazytqysh jabdyqtarmen jaraqtanǵan mamandandyrylǵan «Muhıt» dúkenderiniń jelisi keńeıdi.

1983-1985 jyldary Saǵdıev Qostanaı oblystyq atqarý komıtetiniń tóraǵasy bolyp qyzmet atqardy. Sol kezde eginshilik mádenıet arttyrý, turǵyn úı jáne kommýnaldyq-turmystyq nysandar salý, jol qurylysy  jolyndaǵy kúres tabandylyqpen júrgizildi. Ónerkásip kásiporyndarynda, qurylystarda sharýashylyq esep ustanymdaryn engizýge, al aýyl sharýashylyǵynda - rentabeldilikti arttyrýǵa jáne óz qarajattary esebinen keńeıtilgen udaıy óndiristi qamtamasyz etýge basa kóńil bólindi. Maqtaı Ramazanuly ózine tán qajyr-qaıratpen jáne iskerlikpen keńes jáne partııa jáne sharýashylyq organdarynyń jumys stıli men ádisterin jetildire otyryp, jastardy tárbıeleý jáne oqytý, halyqtyń densaýlyǵyn qorǵaý, olardyń mádenı-turmystyq muqtajdaryn qanaǵattandyrý  problemalarymen yjdaǵatpen aınalysty, munyń barlyǵy zor erlikti, tabandylyqty, dıplomatııalyq sheberlikti talap etti.

1985-1989 jyldary Saǵdıev Kókshetaý oblystyq partııa komıtetiniń birinshi hatshysy bolyp jumys jasady jáne bul oblysty Qazaqstandaǵy aldyńǵy oryndardyń birine shyǵardy.

Budan keıin ol Qazaq KSR Joǵarǵy Keńesi Tóralqasynyń tóraǵasy, el Prezıdentiniń keńesshisi boldy, Qazaqstan Kompartııasy Ortalyq Komıtetiniń múshesi, Joǵarǵy Keńestiń, Parlament Májilisiniń depýtaty bolyp saılandy. 1991 jyldyń sońynda Maqtaı Saǵdıev QR Ardagerler keńesin quryp, oǵan sońǵy kezderge deıin basshylyq etti. Budan basqa Qazaqstan halqy Assambleıasy keńesiniń múshesi, Prezıdent janyndaǵy sybaılas jemqorlyqpen kúres  jáne memlekettik qyzmetshilerdiń qyzmettik etıkasyn saqtaý máseleleri jónindegi memlekettik keńes  tóraǵasynyń orynbasary, el Prezıdenti janyndaǵy ulttyq keńestiń múshesi boldy.