Maqtashylar aýyl sharýashylyǵy zııankesteriniń zardabynan tıisti ónim ala almaı, úlken qarjylaı zııan shegip otyr - Májilis depýtaty
ASTANA. Qazannyń 29-y. QazAqparat - Ońtústik Qazaqstan oblysynyń maqtashylary aýyl sharýashylyǵy zııankesteriniń zardabynan tıisti ónim ala almaı, úlken qarjylaı zııan shegip otyr. QR Parlamenti Májilisiniń depýtaty Óstemir Bektóreev osy máseleni qozǵap, Qazaqstan Respýblıkasynyń Aýyl sharýashylyǵy mınıstri Aqylbek Kúrishbaevqa depýtattyq saýal joldady.
2010 jyly memleket tarapynan 284 mln. teńge hımııalyq óńdeýge qarjy bólindi. Bul qarjyǵa alynǵan hımııalyq preparattar zııankesterge áser etpeı, kóptegen sharýashylyqtar ónim ala almady.
«Bul - maqta sharýashylyǵynyń tarıhynda bolmaǵan jaǵdaı. Dıqandar maqta baǵasynyń kóterilgenine senim artyp otyr. Maqta bir mıllıonnan astam halyqtyń jumys orny, basty kún kórýshiliktiń kózi, eksporttyq daqyl - uzaq saqtaýǵa tózimdi bolsa, basqa daqyldardyń barlyǵy maýsymdyq -daqyl tózimsiz, sol sebepten maqtaly óńirde 55-60 paıyz jerge maqta egýge májbúr»,- dedi depýtat Ó. Bektóreev.
Halyqaralyq sarapshylardyń boljamdary boıynsha, keleshekte de maqta baǵasynyń kóteriletini aıtylýda. Aldaǵy maqsat - gektar ónimdiligin arttyrý. Keńes Úkimeti kezinde ushaqpen, aýyl sharýashylyq tehnıkalarymen hımııalyq preparattardy paıdalanyp, zııankesterdi joıý jumystary júrgizildi. Osy oılardy aıta kelip, depýtat Ó. Bektóreev: «Sol sebepten memleketten bólingen qarjylardy ekologııalyq taza, halyqtyń densaýlyǵyna zııan keltirmeıtin, zııankesterge jaqsy áser etetin ári óte arzan, tabıǵı paıdaly faýnalardy kóbeıtýge jumsaý kerek. Ol úshin bıozerthanalardyń, bıofabrıkalardyń jumysyn jolǵa qoısa jetkilikti. Bul - óndiriste paıdalanylǵan, tájirıbeden, synnan ótken ádis. Mınıstrliktiń tıisti mamandaryn, ǵalymdardy 2011jyldyń basynan bastap osy ádistiń iske asýyna baǵyttaýǵa yqpal etýińizdi suraımyn», - dedi.
