Maqtaraldyń tazalyǵyn avtovokzaldan bastaý kerek - ákim
ASTANA. QazAqparat - Maqtaaral aýdanyna jasaǵan jumys saparynda oblys ákimi Janseıit Túımebaev jospardan tys Jetisaı qalasyndaǵy avtovokzaldyń jaǵdaıyn kórdi, dep habarlaıdy ákimniń baspasóz qyzmeti.
Oblys úshin transporttyq mańyzy bar «Atakent» avtovokzalynda kelýshi halyqqa jaǵdaı jasalmaǵanyn aıtqan ákim qala ortalyǵyndaǵy bul nysan tıisti talapqa saı emestigin aıtty. Sondaı-aq, avtovokzaldaǵy halyqpen sóılesip, qalanyń kommýnaldyq qyzmetiniń jumysy týraly ótinishterin tyńdady.
Avtovokzalǵa japsarlas ornalasqan bazar da óńir basshynyń nazarynan tys qalǵan joq. Munda retsiz saýda məselesi bar ekenin jəne sanıtarlyq talaptarǵa saı emestigin kórgen oblys ákimi nysan ıesine avtovokzal men bazardaǵy olqylyqty bir aı ishinde retke keltirýdi jáne ol jumystardy úılestirýdi aýdan basshysyna tapsyrdy.
«Jalpy ár memlekette, ár oblysta áýejaı, temir jol vokzaly men avtovokzal sol óńirdiń kire beris qaqpasy bolyp sanalady. Sondyqtan da tazalyqty, kóriktendirýdi osy jerden bastaý qajet. Qysqa ýaqyttyń ishinde avtovokzaldyń ishin tazalap, joldy jóndeýdi jáne bazar ishin sanıtarlyq talapqa sáıkestendirýdi tapsyramyn»,-dedi aımaq basshysy.
Munan bólek, oblys ákimi jospardan tys Jetisaı qalasyndaǵy T.Júrgenbaev kóshesiniń boıynda oranalasqan kópqabatty turǵyn úıdi aralap kórip, turǵyndarymen tildesti.
1978 jyly salynǵan bul úılerde káriz júıesi júrgizilmegen, ájethanalary syrtta ornalasqan. Eki qabatty 24 páterli turǵyn úıdiń búgingi jaǵdaıyn kórgen ákim shuǵyl túrde tótenshe jaǵdaı sharalaryn qabyldaý qajettigin aıtty. Munda da turǵyndarǵa tıisti jaǵdaı jasalmaǵanyna kýá bolǵan ákim, kezinde káriz júıesine bólingen qarjyny maqsatty jumsamaǵan azamattardy taýyp, tıisti shara kórý jóninde aýdan ákimine tapsyrma berdi.
Jetisaı qalasynda jalpy 171 kópqabatty turǵyn úı bolsa, onyń eshbirinde káriz júıesi júrgizilmegen. Búginde bul úılerdiń barlyǵyna káriz júıesin júrgizý jumystary bastaldy. Jyl sońyna deıin qurylys jumystaryn aıaqtap, iske qosýdy josparlap otyr. Sondaı-aq, turǵyn úılerdiń aýlasyna oıyn alańshalaryn salyp, abattandyrý jumystary da júrgizilmek.
