Maqtaraldyqtar Qazaqstan halqy Assambleıasynan 180 tonna gýmanıtarlyq kómek aldy

MAQTAARAL.QazAqparat -13 mamyr kúni Túrkistan oblysy Maqtaaral aýdanynyń Atakent aýylyna sý tasqynynan zardap shekkenderge kómek kórsetý úshin avtokerýen kelip jetti, dep habarlaıdy QazAqparat QHA baspasóz qyzmetine silteme jasap.

180 tonnaǵa jýyq gýmanıtarlyq júk tıelgen 16 aýyr júk kóligin Túrkistan oblysy Qazaqstan halqy Assambleıasy kútip aldy.

#Maqtaaralbizbirgemiz! jáne #JúrekJylýy qaıyrymdylyq sharasy aıasynda respýblıka boıynsha etnomádenı birlestikter, Assambleıanyń jastary men eriktileri, QHA músheleri men metsenattary qatysyp, azyq-túlik jáne gıgıenalyq qajettilikter, kıim-keshek, qurylys materıaldary, basqa da taýarlardy jınady.

Avtokerýendi jóneltýge qatysqan QHA Tóraǵasynyń orynbasary Janseıit Túımebaev aktsııaǵa atsalysqandarǵa alǵysyn bildirip, bul qoldaý – aýyzbirshilik pen Qazaqstan halqy birliginiń aıqyn kórinisi ekenin atap ótti.

Jalpy aktsııa aıasynda Maqtaaral aýdanynyń turǵyndaryna 63 mıllıon 470 myń teńge kóleminde gýmanıtarlyq kómek kórsetildi.

Assambleıa tarapynan qoldaý kórsetý jumysy áli de jalǵasyn tabady.