Maqtaralda aýǵan soǵysy ardagerlerine arnalǵan «Dańq alleıasy» ashyldy

Azattyq aýylynan oryn tepken alleıanyń ashylý saltanatyna jergilikti bılik pen QR Parlamenti Májilisiniń depýtaty Baqytbek Smaǵul, aýǵan soǵysynyń ardagerleri men aýyl turǵyndary qatysty, dep habarlaıdy  QazAqparat tilshisi.

Eskertkishke gúl shoqtaryn qoıýdan bastalǵan rásimde memlekettik ánuran aıtylyp, baqılyq bolǵan batyrlarǵa bir mınýt únsizdik jarııalandy. Odan keıin aýdan ákimi Ǵalym Ismaılov sóz sóılep, jańadan ashylǵan nysannyń mańyzdylyǵyna toqtaldy.

 "Taqtada  Aýǵan soǵysyna baryp, eline qaıtpaı qalǵan batyrlarymyzdyń esimderi jazylǵan. Alleıa jastarymyzdy patrıottyqqa tárbıelep, el ıgiligine qyzmet etýge óz septigin tıgizedi degen senimdemiz" - dedi aýdan basshysy.
 

5 gektar aýmaqty alyp jatqan alleıaǵa Aýǵan soǵysynan qalǵan BRDM markaly jaýyngerlik barlaý mashınasy qoıylǵan. Mashınanyń oq tıgen tesikteri surapyl soǵysty eske túsirip, búgingi beıbitshiligimizdiń qadirin túsindirip-aq tur. Myńnan asa túrli kóshetter egilgen alleıaǵa oryndyqtar qoıylyp, turǵyndardyń rýhanı dem alýy úshin barlyq jaǵdaı jasalǵan.

"Uly Otan soǵysy ardagerleriniń erligin qaıtalaǵan birden bir azamattar - aýǵan soǵysynyń ardagerleri. Qandaı qıyndyq kórse de memleketimizdiń qalyptasýyna olar óz úlesterin qosty. Aýyr azaptardy bastan keshirse de olar elge degen mahabbatyn joıǵan emes. Qandaı bolǵanda da jastyǵyn jalaý etip "Elge qyzmet etemin!" dep ketip, azamattaq boryshtaryn adal atqardy. Aşy bolsyn, tuşy bolsyn bul - bizdiń tarıhymyz! " - dedi aıtýly sharada  QR Parlamenti Májilisiniń depýtaty Baqytbek Smaǵul.

Depýtat  sondaı-aq  Aýǵan soǵysy ardagerleriniń atynan Baýyrjan Momyshulynyń "Namys" tósbelgisin aýdan basshysy Ǵalym Ismaılovqa taqty. Shara sońynda turǵyndar ardagerlermen estelikke sýretke túsip, kelgen qonaqtar áskerı dala ashanasynan dám tatty. Jergilikti ónerpazdardyń kontsertin tamashalap, qazaqtyń ulttyq sporty - kókpardy qyzyqtady.