Maqtaral aýdanynda jańa mektep paıdalanýǵa berildi
TÚRKІSTAN. QazAqparat - Túrkistan oblysynda jańa jyl qarsańynda 600 oryndyq jańa mektep paıdalanýǵa berildi. Maqtaral aýdanynda buǵan deıin úsh aýysymmen oqyp kelgen Qajymuqan atyndaǵy jalpy orta mektebiniń oqýshylary endi jańa ǵımaratta bilim alatyn boldy, dep habarlaıdy QazAqparat tilshisi.
Jańadan boı kótergen nysanǵa respýblıkalyq bıýdjetten 1,1 mlrd teńge qarjy jumsalǵan. Mektepte fızıka, hımııa, ınformatıka kabınetteri, mýltımedııalyq jáne lıngafondyq bólmeler sońǵy úlgidegi tehnologııalarmen jáne kompıýterlermen jabdyqtalǵan. Sondaı-aq, túrli sporttyq, óner jáne qolóner t.b. úıirmelerdiń ashylýyna múmkindik týyp otyr. Mekteptiń saltanatyna aýdan ákimi Baqyt Asanov qatysyp, bıyl maqtaly óńirde 5 bilim mekemesi el ıgiligine berilgenin atap ótti.
«Qazirgi tańda aýdanda 2 mekteptiń qurylysy júrip jatsa, taǵy 5 mekteptiń qurylysy bastalǵaly tur. Bizdiń endigi mindetimiz - jyl saıyn 5-6 mektep salý arqyly eki aýysymmen oqıtyn mektepterdiń de sanyn azaıtý bolyp tur» - dedi Baqyt Asanov.
Aıta keteıik, Qajymuqan atyndaǵy jalpy orta mekteptiń negizi 1966 jyly qalanǵan. Bilim uıasynda 587 oqýshy oqyp, 45 bala mektep aldy daıarlyq tobynda tárbıelenedi. Jańa mekteptiń arqasynda qosymsha taǵy 15 jumys orny ashylyp otyr.
