Maqtaral aýdanynda kanaldar arnalarynan tasyp, úılerdi sý basty

Bul týraly búgin oblys ákimi Janseıit Túımebaevtiń  kóktemgi sý tasqynynyń aldyn alý jumystarymen tanysýy barysynda málim boldy, dep habarlaıdy QazAqparat HAA tilshisi.

Aımaq basshysy tikushaqpen birqatar aýdandardy aralap shyqty. Aldymen Maqtaral aýdanyna qonǵan J.Túımebaev tasqyn zardaptaryn joıý boıynsha qurylǵan shtabtyń esebin tyńdady.

Aýdan ákimi Ǵalymjan Ismaılovtyń sózinshe, sý basqan úılerdiń aýlalary tolyǵymen tazartylǵan. Al, mundaı jaǵdaıdyń oryn alýyna  Atakent kentine jaqyn ornalasqan maqtalyq alqaptarda jappaı sor shaıý jumystarynyń júrgizilýi men jerasty sýlarynyń kóterilýi jáne ıesiz qalǵan kanaldardyń tazartylmaýy sebep bolypty.

«Tolassyz jaýyn-shashyn saldarynan kanaldar tolyp, sýlar turǵyn úılerge bettegen. Sebebi, egistik alqaptar eldi mekenniń aınalasynda ornalasqan. Sonymen qatar, kanaldar ishin shóp, qamys, saz-balshyq basyp, tazalanbaǵan. Kanaldyń qorǵanys bógetteriniń jaǵalaýlarynyń 1-2 shaqyrym jerdegi topyraǵyn   jergilikti turǵyndar   alyp ketip, qurylystarǵa paıdalanǵan»,-dedi aýdan ákimi.

Osy rette, aımaq basshysy qaýipsizdik sharalaryn saqtamaǵan kanaldardyń menshik ıelerine eskertý berýdi jáne ıesiz qalǵan kanaldardy memleket menshigine ıaǵnı, «Qazsýshar» mekemesiniń quzyryna berýdi jáne ony tazalaý, retteý jumystaryn júrgizýdi tapsyrdy. Sondaı-aq, jerasty sýlaryn  retteý maqsatynda barlyq drenajdardyń jumys isteý qabiletin qaıta qalpyna keltirip, olardyń durys deńgeıde kútip ustalýyn jáne paıdalanýyn qamtamasyz etýdi júktedi.

Munan soń, J.Túımebaev bastaǵan top Shardara sý qoımasyn əýeden baqylap, Syrdarııa ózeniniń ańǵaryn sholyp shyqty. Kóksaraı sý rettegishinde joǵarydan qarap shyqqan soń Túrkistan, Arys qalalary men Shardara, Otyrar aýdany əkimderi, oblystyq deńgeıdegi sala jetekshileriniń qatysýymen  kóshpeli jıyn ótkizdi.

Onda óńir basshysy barsha jaýapty sala mamandaryna tóteden kelýi múmkin tasqyn sýǵa saqadaı saı bolý qajettigin eskertti.

Oblys aýmaǵynda qalyptasqan sý tasqyny jaǵdaıy týraly baıandaǵan óńirdiń Tótenshe jaǵdaılar departamentiniń bastyǵy Nurbolat Derbisov aımaqtaǵy ózender boıynsha qazirgi jaǵdaıdy baıandady.

«Osy ózenderde tasqynnyń paıda bolýyna qum, tas alý boıynsha karer jumystary saldaryn tıgizýde. Ózenderdiń kez kelgen jerinen shynjyr taban tehnıkalardyń kúndiz-túni shaǵal tastardy artýynan  qazirgi tańda oblystaǵy barlyq ózenderdiń  arnalary ózgerip, ultany birneshe metrge otyrǵan. Jaǵalaýlary kemerlene shaıylyp, quzdanyp ketken. Nátıjesinde jyl saıyn   ózen boıyndaǵy  eldi mekenderge, avtojol men kópirlerge, joǵary qýatty elektrjúıelerine, egistik jerlerge, mazarattarǵa jáne basqa da nysandarǵa qaýpin tıgizýde»,- dedi N.Derbisov.