Maqtaral aýdanynda el Táýelsizdigin jyrlaǵan kontserttik kesh ótti

ShYMKENT. QazAqparat - Ońtústik Qazaqstan oblysy Maqtaral aýdanynda Q.Jandarbekov atyndaǵy Jetisaı drama teatrynda QR-nyń Táýelsizdiginiń 25 jyldyq merekesine oraı kontserttik kesh bolyp ótti, dep habarlaıdy aýdan ákimdiginiń baspasóz qyzmeti.

Merekelik is-sharaǵa Maqtaral aýdanynyń ákimi Ǵalym Ismaılov, QR Bilim jáne ǵylym mınıstrliginiń Baqylaý komıtetiniń tóraǵasynyń orynbasary Talǵat Eshenqulov, aýdandyq Qoǵamdyq keńestiń tóraǵasy Toıym Júnis t.b. aýdannyń qoǵam jáne mádenıet qaıratkerleri qatysty.

  «Árbir eldiń jylnamasynda onyń jańa tarıhynyń bastaýy bolǵan, taǵdyrsheshti tańdary bolǵan. Biz úshin jańa dáýirdiń araıly tańy 1991 jyly 16 jeltoqsanda atty. Sol kúni álem kóginde «Qazaqstan Respýblıkasy» atty jańa juldyz jarqyraı týdy, halqymyz Táýelsizdiktiń myzǵymas tuǵyryn bekitip, Máńgilik el bolýǵa bet burdy. Táýelsizdik, eń aldymen, qazaq halqynyń jáne búkil qazaqstandyqtardyń bostandyqqa umtylǵan asqaq armany men qaısar rýhynyń jemisi. Táýelsizdik kók týdyń jelbiregenin kórip, tynystaıtyn bolashaq úshin qymbat. «Táýelsizdik tuǵyry bıikte», olaı bolsa árbir urpaǵymyzdy patrıottyqqa, otanshyldyqqa, elin, jerin, ata-anasyn qurmetteýge tárbıelep, uly dalanyń sanaly urpaǵyn ósirýge Alla násip etsin!» - dedi Maqtaral aýdanynyń ákimi Ǵ.Ismaılov.

Elordamyz Astana qalasynan arnaıy kelgen QR Bilim jáne ǵylym mınıstrliginiń Baqylaý komıtetiniń tóraǵasynyń orynbasary Talǵat Eshenqulov ta maqtaraldyqtarǵa degen jyly lebizin bildirdi. Ol óz sózinde: «Maqtaral - álemge áıgili qazaq maqtasynyń otany, maqta sharýashylyǵynyń shańyraǵy osy jerde kóterilip, qazyǵy qaǵylǵan. Elimizde dúnıege kelgen árbir besinshi bala - OQO búldirshinderi, árbir tórtinshi oqýshy osy oblysta bilim alady. Endeshe, osy kıeli Ońtústiktegi halqynyń sany eń kóp, eń tyǵyz ornalasqan Maqtaral aýdanynyń Táýelsiz Qazaqstan úshin jasap jatqan jaqsylyǵy men eren eńbegi kóp. Qurmetti maqtaraldyqtar, merekelerińiz qutty bolsyn!» - dedi.

Jalpy, merekelik keshte halyq áni «Alqońyr», B.Tileýhannyń «Meniń elim», E.Zeıphannyń «Kók týdyń jelbiregeni», A.Dúısenovtyń «Qazaqstan», I.Dáribaevtyń «Qazaqstanym», R.Álqojanyń «Táýelsizdik», «E.Hasanǵalıevtiń «Atameken» ánderi maqtaly ólkeniń bulbuldaı daýsy bar ánshileri tarapynan oryndalyp, kelgen qalyń kórermenderdiń rýhyn bir asqaqtatyp tastady.