«Maqtanym, tiregim - otbasym» sharasynda Qazaqstannyń túkpir-túkpirinen kelgen úlgili otbasylar marapattaldy
ASTANA. 19 qarasha. QazAqparat - Astanada QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń uıymdastyrýymen «Maqtanym, tiregim - otbasym» atty ónegeli otbasylarmen kezdesý ótti.
Shara barysynda Qazaqstannyń túkpir-túkpirinen kelgen 16 úlgili otbasy marapattaldy.
QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdihalyqovanyń aıtýynsha, is-sharanyń maqsaty bıyl elimizde alǵash ret atalyp ótkeli otyrǵan 1 jeltoqsan - Tuńǵysh Prezıdent kúni merekesi qarsańynda Elbasymyz N.Á.Nazarbaevtyń júrgizip otyrǵan memlekettik otbasylyq-demografııalyq saıasatyna qoldaý kórsetý bolyp tabylady. Qazaqstannyń órkendeýine eńbegimen de, ónegeli ul-qyzymen de úles qosyp júrgen ata-analar - «Otbasym» jýrnalynda jarııalanǵan materıaldardyń keıipkerleri.
«Tuńǵysh Prezıdent kúni qarsańynda Ulttyq komıssııa jáne «Otbasym» jýrnaly demografııalyq qoldaý kórsetip, otbasylardy, ana men balany demeý maqsatynda osyndaı meıirimdi sharany uıymdastyrdyq. Osy shara arqyly úlgili otbasylardy, kópbalaly, belsendi januıalardy marapattaý arqyly otbasylyq qundylyqtardy nasıhattaýdy kózdedik. Sondaı-aq jas urpaqtyń boıyna ósken uıasyn qasterleý, ul-qyzy úlgi tutar ata-ana bolý sezimin darytý úshin jasalyp jatqan dúnıe bul», - deıdi G. Ábdihalyqova.
